कञ्चनपुरको दोधारा चाँदनी नगरपालिकामा भारतको सहयोगमा सुख्खा बन्दरगाह बन्ने भएको छ।
बिहीबार प्रधानमन्त्री प्रचण्ड र भारतीय समकक्षी नरेन्द्र मोदीबीच कञ्चनपुरको दोधारा चाँदनी नगरपालिकामा भारतको सहयोगमा सुख्खा बन्दरगाह निर्माण गर्ने विषयमा सहमति भएको छ।
सम्झौताअनुसार सुक्खा बन्दरगाह भारतले बनाउनेछ। सम्झौतामा नेपालका तर्फबाट वाणिज्य तथा आपूर्ति सचिव मधुकुमार मरासिनी र नेपालका लागि भारतीय राजदूत नवीन श्रीवास्तवले समझदारी पत्र साटासाट गरे ।
गत फागुन १ गते कञ्चनपुरको दोधारा चाँदनी नगरपालिकामा निर्माण हुने भनिएको सुख्खा बन्दरगाहको अनुगमनका लागि पुगेका प्रधानमन्त्री प्रचण्डले तीन वर्षभित्र निर्माण सक्नेगरि भारतसंगको सहकार्यमा सुख्खा बन्दरगाह निर्माण गर्ने दाबी गरेका थिए ।
उनले भारत भ्रमणमा उक्त सुख्खा बन्दरगाह निर्माणका लागि समझदारी गर्ने पनि बताएका थिए।
‘मेरो भारत भ्रमणमा सुख्खा बन्दरगाह निर्माणका लागि तीन वर्षभित्र सम्पन्न गर्ने गरी दुई देशको बीचमा छिटै समझदारी हुने छ, र निर्माणको काम सुरु हुन्छ,’ प्रचण्डले भनेका थिए ।
राज्यबाट अलग रहेको गुनासो गर्ने यहाँका बासिन्दाहरू चाँडै निर्माण कार्य सुरु हुनेमा आशावादी छन् ।
बन्दरगाह निर्माणका लागि २०६४ सालमै प्रस्ताव भएको थियो। प्रस्ताव भएको झन्डै १० वर्षपछि सरकारले निर्माण प्रक्रिया सुरु गरेको हो।
राष्ट्रिय गौरवको आयोजनाको रूपमा प्राथमिकतामा राखेर निरीक्षण लगायतको काम भएको छ। तर, निर्माणको काम कहिले सुरु हुन्छ भन्ने अझै प्रष्ट छैन।
प्रधानमन्त्री लगायतका धेरै नेताले सुख्खा बन्दरगाह निर्माणको आश्वासन दिएका भए पनि निर्माण सुरु नभएकोमा यहाँका कतिपय बासिन्दाहरू खिन्न पनि छन्।
सुख्खा बन्दरगाह निर्माण हुने ठाउँ। तस्बिरः सबिता बुढा/ सेतोपाटीसुख्खा बन्दरगाह निर्माणका लागि सरकारले नगरपालिकाको मायापुरी र गौरीशंकर सामुदायिक वनको २८० बिघा जमिन छनौट गरेको छ। यी दुई वनले वडा नम्बर १, २ र ३ को भूभाग समेट्छन्।
नेपाल सरकारले बन्दरगाह निर्माणका लागि हाल वातावरणीय प्रभाव मूल्यांकन (इआइए) को काम सम्पन्न भइसकेको जनाइएको छ ।
महाकाली नदीमा बनेको मोटरेबल पुल, ६ लेनको सडक लगायतका पूर्वाधारले सुख्खा बन्दरगाह निर्माणमा सहयोग पुग्ने अपेक्षा गरिएको छ।
