अर्थ मन्त्रालयका सचिव घनश्याम उपाध्यायले निजामती लगायत कर्मचारीको अवकास उमेर ६० वर्ष पुर्याउनुपर्ने बताएका छन्।
शुक्रबार राज्य व्यवस्था तथा सुशासन समितिको बैठकमा बोल्दै उनले कर्मचारीको उमेरहद ५८ बाट ६० वर्ष पुर्याए वार्षिक ६० अर्ब रुपैयाँसम्म बचत हुने बताए।
उनले मुलुकको आर्थिक अवस्थालाई मध्यनजर गर्दै थप अतिरिक्त पद सिर्जना गर्न नहुने बताए।
उनले ३० वटा अतिरिक्त सचिव थप्दा वार्षिक ७ करोड रुपैयाँ खर्च बढ्ने उल्लेख गरे।
उनले सहसचिवको बढुवालाई समयबद्ध बनाउन सचिव र अतिरिक्त सचिवको समयावधि घटाउनु उपयुक्त हुने बताए।
उनले भने, ‘अतिरिक्त सचिव नेपालको सन्दर्भमा असफल अभ्यास हो। यसले निर्णयको तह पनि बढाउँछ र खर्च पनि बढाउँछ। ३० वटा अतिरिक्त सचिव हुँदा वार्षिक रूपमा ७ करोड जति खर्च बढ्दो रहेछ। र अर्को कुरा हामीले यहाँ जति छलफल गरे पनि सचिवको पद घटाउन नसक्ने अवस्थामा छौं। किनभने सहसचिव ११ देखि १२ वर्षमा सचिवमा बढुवा हुन्छन्।’
उनले थपे, ‘सहसचिवको बढुवालाई समयबद्ध गराउने दृष्टिले अतिरिक्त सचिव आएको हो जस्तो लाग्छ र त्यसलाई व्यवस्थापन गर्न सचिव र मुख्य सचिवको १/१ वर्ष समयावधि घटाउने जुन प्रस्ताव छ, त्यसले यसको व्यवस्थापन हुन्छ जस्तो लाग्छ। सचिवको कार्यअवधि पनि घटाउन नसक्ने र अतिरिक्त सचिव पनि सिर्जना हुने अवस्था आउँदा हिजो सहायक सचिव र उपसचिव लगायतबाट पाठ सिकेर यो नगर्दा नै उपयुक्त हुन्छ भन्ने म सुझाव दिन्छु।’
उनले कर्मचारीको क्षेत्रमा अतिरिक्त पद सिर्जना गर्दा निर्णयको तह र खर्च बढ्ने भन्दै त्यस्तो नगर्न सुझाव दिए। —न्युज एजेन्सी नेपाल
