नेपाली कांग्रेस बागमती प्रदेश संसदीय दल नेता चयनका लागि आज निर्वाचन हुँदैछ।
संसदीय दल नेताको हैसियत गुमाएका मुख्यमन्त्री बहादुर सिं लामा तामाङ र प्रदेश सभापतिसमेत रहेका सांसद ईन्द्रबहादुर बानियाँले संसदीय दल नेताका लागि उम्मेदवारी दर्ता गराएका छन्।
आज अपराह्न संसदीय दल नेता छान्न चुनाव हुँदैछ।
संसदीय दल नेतामा उम्मेदवारी दिनुअघि मुख्यमन्त्री लामाले कांग्रेसका ३ जना सांसदलाई मन्त्री नियुक्त गरेका छन्। बागमती प्रदेशमा कांग्रेसका ३७ जना सांसद रहेकोमा मुख्यमन्त्री लामाका पक्षमा १५ जना उभिएका छन् भने २२ जना बानियाँका पक्षमा खुलेका छन्।
मंगलबार हेटौंडामा भएको संसदीय दल बैठकमा मुख्यमन्त्री लामाका पक्ष र विपक्षमा मतविभाजन गर्दा पक्षमा १५ र विपक्षमा २२ मत परेको थियो।
आफ्नो पक्षमा उभिएका १५ मध्ये ३ जनालाई मुख्यमन्त्री लामाले आज मन्त्री बनाएका हुन्। तर शपथ भइसकेको छैन।
मुख्यमन्त्रीका पक्षमा बहादुरसिंह लामा तामाङ, कुन्दनराज काफ्ले, उत्तम जोशी, लक्ष्मी श्रेष्ठ, रमेश महत, हरिप्रभा खड्गी, रामकुमार पहाडी, क्षत्रबहादुर बम्जन, गीता गुरूङ, मसिना खड्का, तीर्थ लामा, रामकृष्ण चित्रकार, माया श्रेष्ठ, गोविन्द लम्साल र समिता खड्गी छन्।
यीमध्ये मुख्यमन्त्री लामाले गोविन्द लम्साल, माया श्रेष्ठ र गीता गुरूङलाई आज मन्त्री बनाएको सांसद रामकृष्ण चित्रकारले बताए।
साथै मुख्यमन्त्रीको विपक्षमा ईन्द्रबहादुर बानियाँ, शिवराज अधिकारी, कञ्चनचन्द्र वादे, दीपेन्द्र श्रेष्ठ, पुकार महर्जन, विनु रायमाझी पौडेल, यमुनादेवी श्रेष्ठ, उर्मिला नेपाल केसी, शान्ता ढकाल, प्रभात तामाङ, छिरीङ्ग दोर्जे लामा, मीना पराजुली, याङ्किला शेर्पा, मीनकृष्ण महर्जन, बिमल ठकुरी, मदुकुमार श्रेष्ठ, सुरजचन्द्र लामिछाने, सुरेश श्रेष्ठ, श्रीराम लामिछाने, सुना परियार, श्याम खड्का र कृष्णबहादुर तामाङ उभिएका छन्। यीमध्ये ५ जना मन्त्री थिए, उनीहरूले पदबाट राजीनामा दिएर बानियाँका पक्षमा खुलेका हुन्।
आन्तरिक मामिला तथा कानुन मन्त्री सुरजचन्द्र लामिछाने, युवा तथा खेलकुद मन्त्री मीनकृष्ण महर्जन, पर्यटन मन्त्री विमल ठकुरी, सहकारी मन्त्री मदुकुमार श्रेष्ठले साउन ९ गते राजीनामा दिएका थिए तर मुख्यमन्त्रीले उनीहरूको राजीनामा स्वीकृत नगरी सोही दिन बर्खास्त गरेका थिए। मंगलबार खानेपानी मन्त्री श्याम खड्काले मुख्यमन्त्रीलाई भेटेर राजीनामा बुझाएका थिए।
संसदीय दल नेता चयनका लागि बागमतीका सहमहामन्त्री हरिशरण श्रेष्ठको संयोजकत्वमा निर्वाचन समिति बनेको छ र उक्त समितिले आज बिहानदेखि नै निर्वाचनको कार्यक्रम अघि बढाएको छ।
संसदीय दल नेतामा मुख्यमन्त्री बहादुर सिं लामा तामाङ र प्रदेश सभापतिसमेत रहेका सांसद ईन्द्रबहादुर बानियाँबीच प्रतिस्पर्धा हुने देखिएको छ। मंगलबार बानियाँका पक्षमा २२ जना सांसद रहेकोले केही फेरबदल नभए अब उनी नै संसदीय दल नेता हुने देखिन्छ।
यसअघि २०७९ मंसिरमा प्रदेश सभा निर्वाचन भएपछि पुस १३ गते संसदीय दल नेताका लागि चुनाव भएको थियो। त्यसबेला पनि लामा र बानियाँबीच प्रतिस्पर्धा भएको थियो, निर्माण व्यवसायी पृष्ठभूमिका दुवै सभापति शेरबहादुर देउवानिकट थिए। तर प्रदेश सभापतिसमेत रहेका बानियाँले संसदीय दल नेतामा सभापति देउवाको समर्थन नपाएपछि नेता शेखर कोइराला र महामन्त्री गगन थापा पक्षको समर्थन लिएर लडेका थिए।
त्यसबेला लामाले २१ र बानियाँले १६ मत ल्याएका थिए। लामाले बानियाँलाई ५ मतान्तरले हराएर संसदीय दल नेता हुँदै बागमतीको मुख्यमन्त्री बनेका थिए। अहिले ठ्याक्कै मत उल्टिएपछि मुख्यमन्त्री लामा जोखिममा परेका हुन्।
संसदीय दल नेता गुमाएका लामाले मुख्यमन्त्रीबाट राजीनामा दिनु नपर्ने अडान राख्दै आएका छन् भने बानियाँले थप केही कदम नचाल्न मुख्यमन्त्रीलाई आग्रह गरेका थिए। तर मुख्यमन्त्रीले संसदीय दल नेता चुनाव हुनुअघि नै आफूसँग उभिएका १५ मध्ये ३ जना सांसदलाई मन्त्री बनाएका छन्। यसमा सत्ता साझेदार नेकपा (एमाले) भने असन्तुष्टि जनाएको छ। एमालेले मुख्यमन्त्री लामालाई पहिले संसदीय दल नेता चयन गरी मन्त्रीहरू नियुक्त तथा शपथ गराउन सुझाव दिएको थियो।
बागमतीमा संसदीय दल नेता हुन १९ मत चाहिन्छ। बानियाँका पक्षमा २२ जना सांसद छन्। बानियाँ आज संसदीय दल नेता चुनिए पनि मुख्यमन्त्रीबाट लामालाई हटाउन समय लाग्ने देखिन्छ। मुख्यमन्त्री लामाले राजीनामा नदिए प्रदेश सभामा अविश्वास प्रस्ताव ल्याउने पक्षमा बानियाँ पक्ष छ तर असार २३ गते बजेट पारित गरेपछि प्रदेश सभा बैठक स्थगित छ।
यो पनि; बागमतीमा कांग्रेसले किन ढाल्न लाग्यो आफ्नै सरकार?
-1746009348.jpg)
