प्रधानमन्त्री पुष्पकमल दाहाल ‘प्रचण्ड’ र एकीकृत समाजवादीका नेता झलनाथ खनालबीच सुदूरपश्चिम प्रदेशको मुख्यमन्त्रीको दाबीमा देखिएको समस्या मिलाउने विषयमा छलफल भएको छ।
प्रधानमन्त्री निवास बालुवाटारमा मंगलबार बिहान भएको छलफलमा सुदूरपश्चिमको मुख्यमन्त्री एकीकृत समाजवादीलाई दिने विषयमा सकारात्मक कुराकानी भएको नेता खनालले बताए।
‘सुदूरपश्चिम प्रदेशमा धेरै ठूलो समस्या छैन। यसैका कारण गठबन्धनमा समस्या सिर्जना पनि हुँदैन। त्यहाँ एकीकृत समाजवादीलाई मुख्यमन्त्री दिनेबित्तिकै सबैकुरा मिल्छ। मैले यही कुरा प्रधानमन्त्रीलाई भनेँ,’ खनालले सेतोपाटीसँग भने।
यसमा प्रधानमन्त्री सकारात्मक रहेको खनालले प्रतिक्रिया दिए। आजको भेटमा नागरिक उन्मुक्ति पार्टी (नाउपा)का अध्यक्ष रञ्जिता श्रेष्ठ पनि रहेको खनालले बताए।
‘तीनैजना बीच एक खालको समझदारी त बनेको छ। सुदूरपश्चिम प्रदेशको मुख्यमन्त्री एकीकृत समाजवादीले पाउनेबित्तिकै विवाद हल हुन्छ,’ उनले भने।
सुदूरपश्चिम प्रदेशको मुख्यमन्त्रीमा एकीकृत समाजवादीले नागरिक उन्मुक्ति पार्टी (नाउपा) का संरक्षक रेशम चौधरीनिकट लक्ष्मणकिशोर चौधरीलाई समर्थन गरेपछि गठबन्धनभित्र खटपट सुरू भएको छ।
एकीकृत समाजवादीले सुदूरपश्चिमको मुख्यमन्त्रीको पहिलो कार्यकाल आफूहरूले नेतृत्व गर्न पाउनुपर्ने अडान राख्दै आएको थियो। तर, प्रधानमन्त्री प्रचण्ड र नेकपा (एमाले)का अध्यक्ष केपी शर्मा ओलीले नाउपालाई दिएपछि एकीकृत समाजवादी असन्तुष्ट बनेको हो।
सोमबार सुदूरपश्चिमको मुख्यमन्त्रीमा नाउपाकै कैलाश चौधरी र लक्ष्मणकिशोर चौधरीको दाबी परेका थियो। लक्ष्मणलाई नेपाली कांग्रेस, एकीकृत समाजवादीको समर्थन छ भनेर कैलाशलाई नेकपा (एमाले), माओवादी केन्द्रलगायतको समर्थन छ।