चितवन राष्ट्रिय निकुञ्जले सालक मारेर अखेटोपहार बिक्रीका लागि ओसारपसार गरेको अभियोगमा ६ जनालाई पक्राउ गरेको छ।
गत असार ५ गते भरतपुर महानगरपालिका–८ स्थित बरण्डाभार मध्यवर्ती उपभोक्ता समितिको क्षेत्रबाट २ जना व्यक्ति सालकको अखेटोपहारसहित पक्राउ परेका थिए।
उनीहरुमाथि अनुसन्धान गर्दै जाँदा थप चार जना पक्राउ परेको निकुञ्जका सूचना अधिकारी संरक्षण अधिकृत गणेशप्रसाद तिवारीले बताए।
राष्ट्रिय निकुञ्ज तथा वन्यजन्तु संरक्षण ऐन २०२९ ले सालकलाई संरक्षित वन्यजन्तुको सूचीमा राखेको छ।
उक्त ऐनको दफा ५ को उपदफा १(क) मा अधिकार प्राप्त अधिकारीबाट लिखित अनुमति नलिइ कुनैपनि व्यक्तिले राष्ट्रिय निकुञ्ज वा आरक्षभित्र वन्यजन्तुको शिकार गर्न वा अखेटोपहार ओसारपसार गर्न नपाउने उल्लेख छ।
पक्राउ परेका ६ जनाविरुद्ध निकुञ्जले शुक्रबार चितवन अदालतमा मुद्दा दायर गर्दैछ।
राष्ट्रिय निकुञ्ज तथा वन्यजन्तु संरक्षण ऐन २०२९ को दफा २६ को उपदफा २ ले सालकलगायतका वन्यजन्तु मार्ने वा घाइते बनाउनेलाई एक लाखदेखि ५ लाख रुपैयाँसम्म जरिबाना वा एक वर्षदेखि दस वर्षसम्म कैद वा दुबै सजाय हुने व्यवस्था गरेको छ। सोही व्यवस्था बमोजिमको सजाय माग गरेर मुद्दा दायर गर्न लागिएको तिवारीले बताए।
उनकाअनुसार असार ५ गते निकुञ्जका कर्मचारी र सुरक्षार्थ तैनाथ नयाँ गोरखगणको संयुक्त अपरेसन टोलीले विशेष सूचनाको आधारमा सालक जस्तो देखिने अखेटोपहार ओसारपसार गर्ने कार्य भइरहेको भनेर खोजतलास सुरु गरेको थियो।
सोहीक्रममा भरतपुर–८ मा बा ३८ प ९३३२ नम्बरको कालो रंगको होण्डा साइन मोटरसाइकलमा पछाडि बस्ने व्यक्तिले खैरो रंगको झोलामा सालक लुकाएको भेटिएको थियो।
परीक्षणका क्रममा सालककै अखेटोपहार देखिएपछि नुवाकोट बेलकोटगढी–१३ बस्ने २४ वर्षीय निरन भड्ताल र नुवाकोटकै विदुर–१३ बस्ने २७ वर्षीय रामचन्द्र सुनारलाई पक्राउ गरिएको थियो।
भड्ताल र सुनारको बयानबाट नुवाकोटको विदुर–६ का २२ वर्षीय विक्रम गहतराज, विदुर–१२ का रामबहादुर मिजार, सूर्यगढी गाफलाटे–३ का रामकुमार सुनार र लिखु–५ का रामकृष्ण मिजारलाई पनि पक्राउ गरिएको तिवारीले जानकारी दिए।
रामकृष्ण मिजार र रामबहादुर मिजारले २०८० को माघमा नुवाकोटको लिखु गाउँपालिका–५ स्थित सामुदायिक वनमा घाँस काट्न जानेक्रममा सालक मरेको अवस्थामा फेला परेर घरमा ल्याई राखेको अनुसन्धानबाट खुलेको छ।
त्यसपछि रामबहादुरले सालकको खपटा बिक्री गर्नका लागि विक्रम गहतराजलाई सम्पर्क गरेका थिए। गहतराजले रामकुमार सुनारलाई सालकको खपटा बिक्री गर्नका लागि सम्पर्क गरेको र रामकुमारले बिक्री गर्नका लागि निरन भड्ताल र रामचन्द्र सुनारलाई चितवन पठाएको अनुसन्धानबाट देखिएको संरक्षण अधिकृत तिवारीले बताए।
