गृहमन्त्री रमेश लेखकको राजीनामा माग गर्दै एक हजारभन्दा बढी दलितले नागरिकताको फोटोकपी जिल्ला प्रशासन कार्यालय काठमाडौंलाई फिर्ता दिएका छन्।
बिहीबार दलितका लागि दलित अभियानका संयोजक खगेन्द्र सुनारलगायत एक हजारभन्दा बढीले प्रशासनका सहायक प्रमुख अनिल पौडललाई नागरिकताको फोटोकपी फिर्ता दिएका हुन्।
'दलितमाथि हुने घटनामा सरकारले लापरबाही गरेपछि नागरिकता नै फिर्ता गरेर आन्दोलन गरेको हौं,' अभियन्ता रेम रसाइलीले भने, 'यो आन्दोलनको एक स्वरूप हो।'
उनका अनुसार अन्तरजातीय प्रेमविवाह गरेका सर्लाहीका दलित युवा सत्येन्द्रकुमार रामलाई गृहमन्त्रीकै प्रत्यक्ष संलग्नतामा यातना दिएको खुलेको छ।
त्यसमा गुहमन्त्री लेखकमाथि छानबिन हुनुपर्ने भन्दै प्रदर्शन भइरहेको छ। सडकमा प्रदर्शन गरिरहँदा सरकारले बेवास्ता गरेपछि उक्त कदम चाल्नुपरेको उनले बताए।
गृहमन्त्री लेखकले राज्यशक्तिको दुरूपयोग गरी दुःख दिइरहेको समाचार सार्वजनिक भएपछि दलित अधिकारकर्मी आन्दोलित भएका हुन्।
गृहमन्त्री लेखकले राजीनामा दिनुपर्ने भन्दै प्रदर्शन गरिरहेका छन्।
