रसुवाको भोटेकोशी नदीमा भीषण भेलबाढी आएको छ।
बुधबार बिहान २ः१४ बजे भोटेकोशीको सतह एक्कासि बढेको रसुवाका प्रमुख जिल्ला अधिकारी अर्जुन पौडेलले जानकारी दिए।
उनका अनुसार केरूङ खोलामा भेलबाढी आएको हो कि, दायाँतर्फको ल्हेन्दे खोलामा भेलबाढी आएको हो भन्ने यकिन भएको छैन।
उक्त भेलबाढीले टिमुरेदेखि रसुवागढीसम्मको बाटो विच्छेदित तुल्याएको छ। त्यहाँको बाटो कटान नै गरेको उनले बताए।
‘भेलबाढीले मानवीय क्षति भएको छैन। बाढी आउनेबित्तिकै प्रहरी टोली परिचालन गरेर स्थानीयलाई सुरक्षित स्थानमा राख्यौं। अहिले पनि नदीको सतह घटेको छैन। स्थानीयहरू घरबाहिरै हुनुहुन्छ,’ उनले भने।
बाढीले त्रिशूली जलविद्युत आयोजनामा पनि व्यापक क्षति पुर्याएको उनले बताए। क्षतिको विवरण भने आइसकेको छैन।
भोटेकोशीको भेलबाढी बिहान ०३ः५५ बजे नुवाकोटस्थित विदुर नगरपालिका आइपुगेको थियो।
अहिले धादिङतर्फ बढिरहेकाले त्रिशूली नदी आसपासमा सतर्कता अपनाउन प्रहरीले आग्रह गरेको छ।
गत असार २४ गते ल्हेन्दो खोला भेलबाढी आउँदा २८ जना बेपत्ता भएका थिए। त्यसमध्ये केहीको शव फेला परेको थियो।
त्यतिबेला ल्हेन्दे खोलाको माथिल्लो जलाधार क्षेत्रमा हिमनदीको माथिल्लो सतहमा रहेको सुप्राग्ल्यासियर ताल विस्फोट हुँदा भेलबाढी आएको प्रारम्भिक निष्कर्ष निकालिएको थियो।
त्यतिबेला केरूङ नाकाको मितेरी पुल बगाउनुका साथै भन्सार यार्डमा रहेका गाडीहरू बगाएको थियो। त्यस्तै स्याफ्रुबेसीदेखि केरूङसम्म पुग्ने बाटो कटान गरेको थियो।
-1746009348.jpg)
