नेपाली राष्ट्रिय यू-१६ टोलीका बलर सुशील रावललाई एक लाख रुपैयाँ आर्थिक सहयोग गर्ने रूप्से होलिडेजले घोषणा गरेको छ।
मलेसियामा भएको एसिसी यू-१६ इस्ट जोन कप विजेता नेपाली टोलीका सदस्य रावलको प्रशिक्षणका लागि नगद सहयोग गर्न लागेको ट्राभल एजेन्सी रूप्सेका सञ्चालक रमेश पराजुलीले सेतोपाटीलाई बताए।
रावलले यसअघि सामाजिक सञ्जालमार्फत् आफूलाई आर्थिक सहयोग चाहिएको बताएका थिए।
रावलले समाजिक सञ्जालको पोस्टपछि आफूहरुले सहयोग गर्ने निर्णय गरेको पराजुलीले बताए। यो रकम क्यानसँगको समन्वयमा हस्तान्तरण गर्ने उनले बताए।
यता रावलले नेपाल प्रिमियर लिग टोली सुदूरपश्चिम रोयल्सले पनि एक लाख रूपैयाँ सहयोग गरेको छ। उनको प्रशिक्षणका लागि नगद सहयोग गरेको सुदूरपश्चिमको भनाइ छ। सुदुरपश्चिमका सिइओ प्रकाश उनलाई आजै रकम हस्तान्तरण गरेका छन्।
यसअघि क्रिकेटर रावलले सामाजिक सञ्जालमा लेखेका थिए, ‘स्वागत र सम्मानमा मलाई प्रमाणपत्र र माला होइन, अहिले आर्थिक सहयोग चाहिएको छ ।म सुशील रावल । मलेसियामा भएको एसिसी यू-१६ इस्ट जोन कप उठाउन सफल खेलाडी । म आज घर फर्किदै छु । दिउँसो २ बजे काठमाडौंदेखि धनगढीको टिकेट छ । बझाङबाट छनौट भएर खेलेपनि दैनिकी बसाई कञ्चनपुरको शुक्लाफाँटा ५ गर्जमुनिमा छ। अहिले मलाई सम्मानको रूपमा खादा र प्रमाण पत्र भन्दा पनि आर्थिक सहयोगको एकदमै जरुरी परेको छ।'
उनले अघि लेखेका थिए,'२/३ महिना यू-१९ राष्ट्रिय टोलीका लागि छनोट हुँदै छ। त्यसका लागि तालिम गर्न भारत जानुपर्ने भएको छ । करिब १ लाख खर्च लाग्दै छ । आर्थिक अवस्था कमजोर छ । भनेर भन्दा मलाई गरो छैन । त्यही भएर मलाई सम्मानको खादा माला र प्रमाण पत्र भन्दा आर्थिक कुरालाई महत्त्व दिई दिनुहोला । सुरुवात भएको छ । सफल बनाउने पालो अब तपाईंकोहरुको । विशेष अनुरोध वा यसलाई जे भन्नुहुन्छ । साथ सहयोग र मायाका लागि धेरै धेरै धन्यवाद छ।’
-1746009348.jpg)
