नेपाल तेक्वान्दो संघले राष्ट्रिय खेलकुद परिषद्आयोजित ६२औं वार्षिक उत्सवमा दिएको पुरस्कारमा आपत्ति जनाएको छ।
संघले परिषद्ले खेलाडी, प्रशिक्षक र राष्ट्रिय खेल संघहरूलाई सम्मान गर्ने परम्पराको स्वागत गरेको छ। तर, यसपटकको पुरस्कार वितरणमा भएको विभेद र मनमानी व्यवहारप्रति आपत्ति जनाइएको छ।
विशेष गरी, पेरिस ओलम्पिकमा नेपालका लागि पहिलो ऐतिहासिक पदक जित्ने खेलाडी र संघको उपेक्षा गरिएकोमा घोर भर्त्सना गरिएको छ।
संघले यो कार्यलाई नेपाली खेलाडी र खेलकुद संघहरूमाथिको पूर्वाग्रह र अवमूल्यनको उदाहरणको रूपमा व्याख्या गरेको छ।
संघले पुरस्कार मूल्यांकनका आधारहरू, अधिकार र निर्णय प्रक्रियामा पारदर्शिताको माग गर्दै दोषीमाथि कारबाहीको पनि माग गरेको छ।
यसअघि राखेपले गत शुक्रबार राष्ट्रिय पुरुष-महिला खो खो टोलीलाई उत्कृष्ट अवार्डसहित शुक्रबार पुरस्कृत गरेको थियो। खो खो टिम सिनियरतर्फ पुरस्कृत भएको हो।
पुरुष-महिला टोलीलाई समान १–१ लाख नगद पुरस्कारसहित ट्रफी प्रदान गरिएको थियो। दुवै टिमले भारतमा भएको प्रथम खो खो विश्व कप तथा नेपाल र भारतबीच भएको टेस्ट म्याचमा रजत जितेका थिए ।
खो खो टिमसँगै जुनियरमा २ र पारामा १ खेलाडी, १० कर्मचारी, १ राष्ट्रिय खेल संघ, १ प्रायोजक, २ पत्रकार र १ स्थानिय तहलाई पनि पुरस्कार गरिएको थियो।
-1746009348.jpg)
