सरकारको पहलमा गठन भएको नेपाल ओलम्पिक कमिटीको तदर्थ समितिका अध्यक्ष ध्रुबबहादुर प्रधानलाई ओलम्पिक काउन्सिल अफ एसिया (ओसिए) ले चेतावनी दिएको छ।
ओसिएका डिरेक्टर जनरल हुसेन अल मुसल्लाहमले पत्र लेख्दै अनाधिकृत रुपमा ओसिएको लोगो प्रयोग गरेको भन्दै औपचारिक रुपमा चेतावनी दिएका हुन्। लोगो प्रयोग गर्न नरोके कानुनी उपचार जाने पनि पत्रमा उल्लेख छ।
नेपाल ओलम्पिक कमिटी (एनओसी) भित्रको विवाद चर्कदै जादा ओसिसीले तदर्थ समितिलाई पत्राचार गरेको हो।
एनओसीको यसअघि दुई कार्यकाल अध्यक्ष भइसकेका ध्रुवबहादुर प्रधान र जीवनराम श्रेष्ठका समूह विवादमा आमनेसमाने भइरहेका छन्।
गत मंसिरमा जीवनराम श्रेष्ठले आफू तेस्रो कार्यकालका लागि अध्यक्ष हुन विशेष साधारण सभा बोलाएपछि सरकारले त्यसलाई खेलकुद ऐनविपरित भएको भन्दै अवैधानिक कदम भनेको थियो। त्यसपछि सुरु भएको ओलम्पिक कमिटीको विवाद जटिल अवस्था छ।
खेलकुद ऐनमा कुनै पनि खेल संघमा एक व्यक्ति दुई कार्यकालभन्दा बढी पदमा निर्वाचित नुहन सक्ने व्यवस्था छ। तर ओलम्पिक कमिटी अरू खेल संघ झैं नभएको तथा अन्तर्राष्ट्रिय अभ्यासमा दुई कार्यकालभन्दा बढी पदमा रहने सक्ने बताउँदै सरकार र अदालतको आदेशविपरित जीवनराम तेस्रो कार्यकालका लागि अध्यक्ष चुनिएका थिए।
यसरी सरकार र अदातलको आदेश नमानेपछि कडा कदम लिँदै आएको खेलकुद मन्त्रालयले सरकरी मान्यता पाएका २३ खेल संघका पदाधिकारीसँग छलफल गरेको थियो।
त्यसकै नतिजास्वरूप हालका मानार्थ अध्यक्ष ध्रुवबहादुर प्रधानको संयोजकत्वमा गत साउन २६ गत तदर्थ समिति गठन गरिएको थियो।
तदर्थ समितिले ओलम्पिकमा आबद्ध २७ मध्ये २३ संघका प्रतिनिधिको समर्थन आफूलाई रहेको बताएको छ। तर कतिपय संघलाई अन्तर्राष्ट्रिय मान्यता छैन।
जीवनराम श्रेष्ठले भने आफू ओलम्पिकको विधानअनुसार अध्यक्ष भएको र सरकारका कदमलाई 'सरकारी हस्तक्षेप' को संज्ञा दिँदै आएका छन्।
-1746009348.jpg)
