सिमोस सुनुवार निर्देशित फिल्म 'जन्ते बाख्रो' को पहिलो गीत सार्वजनिक भएको छ।
बिहीबार जि २१ डिजिटल युट्युब च्यानलमार्फत फिल्ममा समावेश 'घामै राजा' बोलको गीत सार्वजनिक गरिएको हो। संगीतकार बाबुल गिरीको शब्द रचना, संगीत तथा स्वर रहेको गीतमा फिल्मका कलाकार सौगात मल्ल र गरिमा शर्मा रोमान्टिक अवतारमा प्रस्तुत छन्। गीतको अन्तिममा अभिनेता आशिफ शाहलाई पनि सप्राइजको रूपमा देखाइएको छ।
फिल्ममा सौगात, आशिफ र गरिमासँगै रमा थपलिया, लोकेन्द्र लेखक, कमल देवकोटा, विशाल पहाडी, रुशा न्यौपाने, कुसुम शर्मा, स्नेहा जोशी, समापिका गौतम, कुशल गजमेरलगायत कलाकारको अभिनय छ।
मुईन इन्टरटेनमेन्टको प्रस्तुति रहने 'जन्ते बाख्रो' सामाजिक कमेडी कथावस्तुमा निर्माण भएको छ। प्रदीप भारद्धाजको कथा, पटकथा र संवाद लेखन रहेको फिल्मको निर्माता सन्तोष गौतम हुन्।
फिल्म हरि हुँमागाईंको डिओपी, उत्तम हुँमागाईंको सिनेमाटोग्राफी, सुनिल शिवभक्तिको सम्पादन र रोयल भिमसेन (ट्राइडेन्ट कन्सेप्ट टिम) को पोस्टर डिजाइन रहेको छ। टिफल्क फिल्म्सले वितरण गर्ने फिल्मको डिजिटल राइट्स जी टु वान डिजिटलले खरिद गरेको छ।
यो फिल्म जेठ ९ गतेदेखि हलमा प्रदर्शन हुनेछ।
