फिल्म 'जनै हराएको बाहुन' को आइतबार बिहान शुभमुहूर्त गरिएको छ।
काठमाडौंको बुढानीलकण्ठ मन्दिर परिषरमा पूजा गर्दै गरिएको मुहूर्त समारोहमा फिल्ममा अभिनय गर्न लागेका अधिकांश कलाकारको उपस्थिति रहेको थियो। अभिनेत्री मिरूना मगर, अभिनेता सुशांक मैनाली, कलाकार गौरव पहाडी र भोलाराज सापकोटाले मुहूर्त सर्ट दिएका थिए।
फिल्मको छायांकन सोमबारदेखि सुरू हुने निर्माणपक्षले जनाएको छ।
'जनै हराएको बाहुन' हिमाल न्यौपानेले निर्देशन गर्दैछन्। फिल्ममा विजय बराल, सुशांक मैनाली, केकी अधिकारी, मिरूना मगर, गौरव पहाडी, रेयर राई, भोलाराज सापकोटा लगायत कलाकारहरूको अभिनय रहनेछ।
शुभमुहूर्तपछि मिडियासँग संक्षिप्त कुरा गर्दै अभिनेत्री मिरूनाले भनिन्, 'यो टिममा आबद्ध हुन पाउँदा नै म एकदमै खुसी छु। सम्पूर्ण टिमलाई नै धन्यवाद भन्न चाहन्छु। यसमा मेरो क्यारेक्टर मेरा लागि विशेष छ।'
असोसियट निर्देशक रहेका अभिनेता मनिष राउतले 'जनै हराएको बाहुन' सबै नेपालीको कथा रहेको बताए । 'यसमा हाम्रो सम्बन्धको कथा छ, दाजुभाइबीचको सम्बन्धका बारेमा छ, आमा छोराका बारेमा छ,' उनले भने ।
यस्तै, अभिनेता मैनालीले फिल्म 'टलकजंग भर्सेज टुल्के' रिलिज भएको १० वर्षपछि आफू फिल्ममा देखिन लागेको बताउँदै यो टिममा आबद्ध हुन पाउँदा नै म एकदमै खुसी लागेको बताए।
'जनै हराएको बाहुन' ले गाउँदेखि सहर आएका एक सरल व्यक्तिले भोग्नुपरेका अनपेक्षित घटना र त्यसले उनको जीवनमा ल्याएको परिवर्तनको कथा भन्नेछ। फिल्मले आमा र छोराबीचको भावनात्मक कथा भन्ने जनाइएको छ।
फिल्मको कथा, पटकथा र संवाद भानुभक्त ढकालले लेखेका छन्। पेपरक्लिप प्रालिको निर्माण रहने फिल्मका निर्माता विमल न्यौपाने हुन्। कार्यकारी निर्मातामा कमल न्यौपाने, नारायण तिम्सिना, चुरामणी शिवाकोटी, रूपेश लामा र आरके मानन्धर रहेका छन्।
फिल्मको सोमबार काभ्रेपलान्चोकको पनौतीबाट छायांकन सुरू हुनेछ। पाल्पा र काठमाडौंमा पनि छायांकन हुनेछ।
४० दिनको रहेको छायांकन सेड्युल रहेको फिल्म नवीन गुरूङले खिच्नेछन्।
