सुपरहिट नेपाली फिल्म 'ऊनको स्वीटर' शुक्रबारदेखि भारतमा रिलिज भएको छ।
दार्जिलिङ, सिलिगुडीका १४ हलहरूमा फिल्म रिलिज भएको हो। नयाँ दिल्ली, असाम लगायतका स्थानहरूमा भने आगामी हप्ता रिलिज हुने बताइएको छ।
दार्जिलिङको एसभिएफ सिनेमा, कस्र्याङको फन्टाजी सिनेमा, नाम्ची इम्पेरियल सिनेमा, गान्तोकका डेन्जोङ, वज्र र आईएनओएक्स गान्तोक, तथा सिलिगुडीका सिनेमा सिटी सेन्टर, वेगा सर्कल, एग्रोपोलिस र साउथ सिटी लगायत हलहरूमा फिल्म प्रदर्शनमा आएको हो।
भारत रिलिजको पूर्वसन्ध्यामा बिहीबार सिक्किमको राजधानी गान्तोकमा फिल्मको भव्य प्रिमियर गरिएको थियो। सिक्किम राज्यका प्रतिष्ठित व्यक्तित्व, कलाकार तथा दर्शकहरूको उत्साहपूर्ण उपस्थितिबीच प्रिमियर भएको हो।
नेपालबाट अभिनेता विपिन कार्की, गायक सुजन चापागाईँ, कलाकार भावना खपांगी मगर, छायांकार चिन्तन राज भण्डारी, सम्पादक कृष्ण भण्डारी, निर्देशक नवीन चौहान तथा निर्माताहरूसहितको टिम यतिबेला सिक्किममा छ।
निर्देशक नवीन चौहानले सिक्किमेली दर्शकमाझ फिल्म प्रस्तुत गर्न पाउनु गर्वको कुरा भएको बताए। भारतभरका नेपाली भाषी दर्शकको साथले भविष्यमा अझ धेरै राम्रा नेपाली फिल्म नियमित रूपमा रिलिज हुने मार्ग खुलेको उनले बताए।
गायक सुजन चापागाईँ, निर्देशक नवीन चौहान, अभिनेता–अभिनेत्रीसहितको समूहले दार्जिलिङ, सिलिगुडी, गान्तोक, कस्र्याङ र कालिम्पोङका हलहरूमा पुगेर दर्शकसँग प्रत्यक्ष भेटघाट गर्ने कार्यक्रमसमेत तय गरिएको छ।
भारतको वितरक कम्पनी एसली प्रोडक्सनका प्रमुख एवन राईले सिक्किम सरकारले दिएको सहयोगप्रति आभार व्यक्त गरे।
उनले भने, 'सिक्किम सरकार र स्थानीय समुदायले देखाएको साथले भविष्यमा नेपाली चलचित्रको उपस्थिति भारतभर उल्लेखनीय बनाउन मद्दत गर्नेछ। ‘ऊनको स्वीटर’ हाम्रो पहिलो प्रयास हो, र यसले बलियो संकेत दिइसकेको छ।'
यसअघि बुधबार एमजी रोड, गान्तोकमा 'ऊनको स्वीटर साँझ' कार्यक्रमको समेत आयोजना गरिएको थियो।
नेपालमा गत वैशाख २६ गते रिलिज भएको 'ऊनको स्वीटर' ले देशभरका करिब ४० सिनेमा हलमा ५१ दिन मनाएको थियो।
-1746009348.jpg)
