हास्य कलाकार अर्जुन घिमिरे (पाँडे) को डेब्यु निर्देशनमा निर्माण भएको फिल्म 'झरीपछिको इन्द्रेणी' को पोस्टर सार्वजनिक गरिएको छ। आइतबार सार्वजनिक पोस्टरमा फिल्मका प्रायः सबै मुख्य कलाकारहरूलाई 'क्यारेक्टर लुक्स' सहित प्रस्तुत गरिएको छ।
फिल्ममा गणेश उप्रेती, रमेश उप्रेती, प्रकाश घिमिरे, दीपाश्री निरौला, सरिता गिरी, देशभक्त खनाल, निर्मल शर्मा, कृष्ण शिवाकोटी, कृष्णभक्त महर्जन, अर्जुन घिमिरे (पाँडे), प्रियना आचार्य (मुन्नी), अंशु महर्जन, राजेन्द्र नेपाली र लक्षणा राईको अभिनय रहेको छ।
नागराज इन्टरटेन्मेन्ट प्रालिको ब्यानरमा निर्माण भएको यस फिल्ममार्फत अभिनेता गणेश उप्रेती लामो अन्तरालपछि अभिनयमा फर्किएका छन्। फिल्म छायांकनकै लागि उप्रेती अमेरिकाबाट नेपाल आएका थिए।
त्यस्तै, यसै फिल्मबाट कलाकार विमोचन दवाडी र जेसिका पोखरेलले अभिनयमा डेब्यु गर्दैछन्। साथै, बाल कलाकारको भूमिकामा दिप्सन चिलवालको अभिनय छ।
निर्देशक घिमिरे स्वयंको कथा रहेको फिल्मको पटकथा तथा संवाद गणेश कार्की र विशाल घिमिरेले मिलेर लेखेका हुन्। चलचित्रलाई बुद्ध थापाले छायांकन गरेका हुन्।
फिल्मको निर्मातामा अनिशा सेन्दाङ लिम्बु रहेकी छन्। सह-निर्मातामा अनु थापा, पंकज खड्का, सिर्जना खड्का, सुवास शर्मा र राम कार्की छन्।
'झरीपछिको इन्द्रेणी' पुस ४ गतेदेखि प्रदर्शनमा आउनेछ।
-1746009348.jpg)
