भारतीय निर्देशक सन्दीप रेड्डी वांगा र अभिनेता प्रभासको आगामी फिल्म 'स्पिरिट' को छायांकन औपचारिक रूपमा सुरू भएको छ। निर्माण पक्षले आइतबार फिल्मको टिमका साथ मुहूर्त गरेको हो।
मूहुर्तमा निर्माता भूषण कुमार र अभिनेत्री तृप्ति डिमरी उपस्थित रहे। अभिनेता चिरञ्जीवी मुख्य अतिथिका रूपमा उपस्थित भए।
फिल्मको आधिकारिक सामाजिक सञ्जाल (एक्स) ह्यान्डलमार्फत सार्वजनिक तस्बिरमा चिरञ्जीवी र भूषण कुमारले फिल्मको क्ल्यापबोर्ड समातेको देखिन्छन्। तर, फिल्मका मुख्य अभिनेता प्रभास भने तस्बिरमा कतै देखिएनन्। साथै, प्रकाश राज र विवेक ओबरोय पनि तस्बिरमा अनुपस्थित थिए।
तस्बिरमा प्रभास नदेखिएपछि फ्यानहरूले चासो व्यक्त गरेका छन्। धेरैले फिल्मका लागि प्रभासको ‘लुक’ सार्वजनिक नहोस् भनेर उनी तस्बिरमा नआएको अनुमान गरेका छन्।
सामाजिक सञ्जालमा फ्यानहरूले 'प्रभास खोइ?' भन्दै प्रश्न गर्नुका साथै सन्दीप र प्रभासको सहकार्य हेर्न र प्रभासको नयाँ रूप देख्न प्रतीक्षामा रहेको प्रतिक्रिया दिएका छन्।
फिल्ममा प्रभास प्रहरीको भूमिकामा देखिनेछन् भने तृप्ति डिमरीले उनको प्रेमिकाको भूमिका निर्वाह गर्नेछिन्।
'स्पिरिट' भूषण कुमारको टी–सिरीज र सन्दीपको भद्रकाली पिक्चर्सबीचको सहकार्य हो।
घोषणादेखि प्रतीक्षित मानिएको फिल्म सन् २०२६ मा रिलिज हुनेछ।
-1763886130.jpeg)
-1746009348.jpg)
