विगतका वर्षमा जस्तै यसपालि पनि गायिका विष्णु माझीको तीज गीत युट्युबमा सार्वजनिक भइसकेको छ।
बुधबार बिहान उनको एकल स्वरमा आएको 'म त नराउरी' गीतले सार्वजनिक भएसँगै चर्चा पाइरहेको छ।
'पुतलीको भट्टी' भाग २१ का रूपमा आएको गीतमा खासगरी छोरा र छोरीबीचको विभेद, पितृसत्तात्मक सोच र नारीको जीवनको मार्मीक कथालाई उठान गरिएको छ।
लगभग १४ मिनेटको भिडिओ बिदाइको दृश्यबाट सुरू हुन्छ, जहाँ युवती आफ्नो परिवार र माइतीघर छोड्दैछिन्। उनका आँखामा आँसु र परिवारको अनुहारमा विछोडको दुःखले भिडिओको सुरूआती भाव कारूणिक बनाएको छ।
त्यसपछि तीजको नाचगानसँगै युवतीको मनभित्र लुकेको वेदना र विगतको सम्झनालाई उजागर गरिएको छ। विगतको सम्झनामा फर्किँदा छोरा र छोरीको विभेदको कुरालाई भिडिओमा देखाइएको छ। 'तिम्रै छोरो राम्रा, म त नराउरी' भन्ने शब्दमार्फत पितृसत्तात्मक सोचमाथि ब्यंग्य गरिएको छ।
समग्रमा भिडिओले लैंगिक विभेद, माइतीघर छोडेर जाँदा भोग्ने विछोडको पीडा, नयाँ घरमा आइपर्ने संघर्ष र जिम्मेवारी, चाडपर्वमा देखाइने खुसीभित्र लुकेको पीडाको कथालाई मर्मस्पर्शी रूपले प्रस्तुत गरेको छ।
भिडिओमा एकातर्फ युवतीको संघर्षपूर्ण जीवन देखाइएको छ भने अर्कोतिर उनी सारीमा सजिएर तीज गीतमा नाचिरहेको दृश्य छ। यसले चाडपर्वको रमाइलोभित्र पनि नारीहरूले आफ्नो दुःख लुकाएर हाँस्नुपर्ने पितृसत्तात्मक सोचलाई संकेत गर्छ। गीत गाउँदै नाच्दै गर्दा पनि युवतीको अनुहारमा माइतीको याद र मनमा पीडा झल्किएको भिडिओमा देखिन्छ।
आमालाई सम्बोधन गरेर बेदना पोखेको गीतमा विष्णुको पुरानै मिठासपूर्ण गायकी पाइन्छ। सदाझैं शब्द, संगीत र भिडिओ निर्देशन विष्णुका श्रीमान सुन्दरमणि अधिकारीको छ। आशिष अविरलको एरेन्ज रहेको गीत राग स्टुडिओमा रेकर्डिङ गरिएको हो।
गीतको लय विष्णुका यसअघि सुनिसकेको गीतको जस्तो लाग्न सक्छ। कतिपयले शब्द पहिलेको जति राम्रो आउन नसकेको भनेर समेत प्रतिक्रिया दिएको युट्युबमा देख्न सकिन्छ। गीत र भिडिओमा उठाइएको विषयवस्तु अहिले समाजबाट हटिसकेको तर यो विगतको समाजको यथार्थ कथा भएको जस्ता प्रतिक्रियाहरू समेत युट्युबमा देखिन्छ।
भिडिओमा विष्णुको अघिल्ला सुपरहिट गीत 'चरी जेलैमा', 'आइनँ आमा यो तीजमा' कै मोडल ललिता पौडेललाई निरन्तरता दिइएको छ। त्यस्तै, कोरियोग्राफीमा पनि मौसम हिमालीले निरन्तरता पाएका छन्। भिडिओमा ६० जना कोरस डान्सर नचाइएको छ। कलाकारको काम राम्रो छ। तर, उनी दोहोरिएकाले खास्सै नयाँपन नलाग्न सक्छ। कोरियोग्राफर पनि एउटै भएकाले सेटअप र कोरियोग्राफी पहिल्यै हेरेकोजस्तो लाग्न सक्छ।
नयाँ तीज गीत विष्णु माझीको स्वरका पारखीलाई भने पक्कै मन पर्नेछ।
भिडिओमा छायांकन शम्भु चालिसेको छ भने सम्पादन प्रविन भट्टले गरेका हुन्।
भिडिओः
-1746009348.jpg)
