गायिका झुमा लिम्बुले 'रैथाने घुमफिर २०८२' सांगीतिक कार्यक्रम लिएर नेपाल टुर गर्ने भएकी छन्।
उनी र उनको ब्यान्ड 'दि रैथाने' ले आगामी असोज ३ गतेबाट प्रदर्शनमा आउन लागेको फिल्म 'जारी २' सँगको सहकार्यमा यो सांगीतिक यात्रा गर्न लागेको हो।
कन्सर्टको सुरूवात भदौ २१ गते काठमाडौंको ठमेलस्थित एलओडी क्लबबाट हुनेछ। जहाँ 'जारी २' को टिमले विशेष च्याब्रुङ नाच प्रस्तुत गर्नेछ।
रैथाने घुमफिरमा झुमाले नेपालका विभिन्न १० सहरमा प्रस्तुति दिनेछिन्। जसमा उनको व्याण्डको शोलो प्रस्तुति रहनेछ। त्यसका साथै जुन ठाउँमा कन्सर्टको आयोजना हुनेछ, त्यहाँको स्थानिय कला संस्कृति र गीत संगीतलाई विशेष प्राथमिकतामा राखिने गायिका लिम्बुले बताएकी छन्।
यो सांगीतिक यात्रामार्फत सांस्कृतिक पहिचानको प्रवद्र्धन गर्ने उद्देश्य लिइएको छ। विभिन्न सहर र गाउँहरूमा पुगेर स्थानीय लोकसंगीतहरू जस्तै हाक्पारे पालाम, च्याब्रुङ, घाँटु, सोरठी, देउडा र मारूनी जस्ता संगीत र नृत्यलाई केन्द्रमा राखेर सांगीतिक प्रस्तुति दिइनेछ।
लोकसंगीत केवल मनोरञ्जनको माध्यम मात्र नभएर नेपालको मौलिक सांस्कृतिक जीवनशैली, इतिहास र सामुदायिक एकताको प्रतिबिम्बको रूपमा रहेको गायिका लिम्बुको भनाइ छ ।
उनले भनिन्, 'यो यात्राले संस्कृति र संगीतलाई नयाँ पुस्तामा पुर्याउने आशा लिएका छौं। 'रैथाने घुमफिर' ले गाउँ र सहरको संगीत र संस्कृतिलाई जोड्न एउटा पुलको रूपमा काम गर्ने विश्वास छ।'
यो रैथाने घुमफिर यो वर्ष नेपालमा मात्रै आयोजना हुने र अर्को वर्ष यसलाई विदेशमा समेत लैजाने योजना गायिका झुमा लिम्बुको छ।
हरेक प्रस्तुतिमा स्थानीय कलाकार, वाद्यवादन र संस्कृतिको सम्मान गर्दै विविधता प्रदर्शन गरिने आयोजकले जनाएको छ।
'रैथाने घुमफिर' का अन्य कार्यक्रमहरू विस्तारै सार्वजनिक गरिने बताइएको छ।
-1742801159.jpg)
-1746009348.jpg)
