मण्डला थिएटरमा यही असार २१ गतेदेखि नाटक 'हराएको कुकुर' मञ्चन हुने भएको छ।
साउन ४ गतेसम्म मञ्चन हुन लागेको नाटकको निर्देशक मणि कुलुङ राई हुन्। कथा तथा परिकल्पना समेत उनकै रहेको नाटकलाई रबिन तामाङले नाट्य रूपान्तरण गरेका छन्।
नाटकमा कबि प्रहर (किरण नेपाली), तारा (स्मृती कल्मर), राधिका (रेज्मी राई), इन्द्रेणी (इन्द्रेणी कुलुङ), सुकमाया (रमा कुलुङ), बिर्खमान (अबिनास डि एम), सुसारे (मिना श्रेष्ठ), मौसम (मनि कुलुङ), प्रकाश (सुनिल वाहिङ राई) को अभिनय रहनेछ।
दिउँसो ४ बजे मञ्चन हुने नाटक शुक्रबार, शनिबार र आइतबार दिउँसो २ बजे पनि मञ्चन हुनेछ।
कस्तो नाटक हो 'हराएको कुकुर'?
निर्माण टिमका अनुसार यो एउटा रूपकात्मक नाटक हो, जसले राज्य संरचनामा व्याप्त अन्याय, अनुसन्धान प्रणालीको पक्षपात, र नागरिक आवाजमाथिको दमनलाई उजागर गर्छ। कुकुर हराएको सामान्य घटनाबाट सुरू हुने यो कथा क्रमशः एउटा गम्भीर सामाजिक-राजनीतिक विमर्शमा रूपान्तरण हुन्छ।
नाटकको सुरूआतमा एक कुकुर हराउँछ। 'सानो माछा ढडियामा, ठूलो माछा बढिएमा' भन्ने जनकथन यहाँ कानुनी प्रणालीको वास्तविक अनुहार बनेर प्रस्तुत हुन्छ। निर्दोष जनताले अन्यायको विरोध गर्दा उनीहरूलाई नै अपराधी ठहर गरिन्छ। अनुसन्धान गर्ने निकायहरू निष्पक्षता गुमाएर शक्तिशाली पात्रहरूका आज्ञाकारी बन्न पुग्छन्। प्रमाणहरू हराइन्छन्, घटना ढाकछोप गरिन्छ, र सत्यको स्वर दबाइन्छ। नाटकको उत्कर्षमा हराएको कुकुर भेटिन्छ, जुन दृश्यले एउटा समाधान प्रस्तुत गरेजस्तो देखिए पनि नाटकका मूल प्रश्नहरू अझै अनुत्तरित रहन्छन्।
'हराएको कुकुर' वास्तवमा राज्यद्वारा हराइएको सत्यको प्रतीक रहेको यसको निर्माण टिमले जनाएको छ।
-1746009348.jpg)
