नेप्लिज योङ इन्टरप्रेनियर्स फोरम (एनवाइइएफ) काठमाडौं च्याप्टरले ग्लोबल आइएमई बैंक एनवाइइएफ स्टार्टअप अवार्ड्स ४.० का लागि ओरियन्टेसन कार्यक्रम सफलतापूर्वक सम्पन्न गरेको छ।
मंसिर ७ गते पाटन कलेज फर प्रोफेशनल स्टडिजमा सम्पन्न भएको उक्त कार्यक्रमले नेपालमा उद्यमशीलताको सम्भावनालाई मजबुत बनाउने आयोजकले बताएका छन्।
यस वर्षको प्रतियोगिताका लागि नेपालभरका १७० भन्दा बढी स्टार्टअपहरू दर्ता भएका छन्। उक्त ओरियन्टेसनले प्रतियोगिताको प्रक्रिया, मेन्टरशिप र वृद्धिका अवसरहरूका बारेमा विस्तृत जानकारी प्रदान गरेको थियो।
कार्यक्रमको सुरुवात एनवाइइएफ काठमाडौं च्याप्टरका अध्यक्ष अभिमन्यु गोल्छाको स्वागत सम्बोधनबाट भएको थियो जसमा उनले स्टार्टअपहरूलाई स्केल गर्न र सफल बनाउन यस्ता प्लेटफर्महरूको महत्वलाई जोड दिएका थिए।
कार्यक्रमका अध्यक्ष सन्दीप शर्माले प्रतियोगिताको संरचनाबारे विस्तृत जानकारी प्रदान गर्दै मेन्टरशिप, नेटवर्किङ र पुरस्कार जित्ने अवसरहरूलाई प्रस्ट पारेका थिए।
कार्यक्रमको समापन एनवाइइएफ नेसनल गभर्निङ काउन्सिलकी कार्यकारी सदस्य बिलाषा श्रेष्ठको सम्बोधनबाट भएको थियो।
ग्लोबल आइएमई बैंक एनवाइइएफ स्टार्टअप अवार्ड्स ४.० केवल एक प्रतियोगिता मात्र नभइ ५ लाख रूपैयाँभन्दा माथिको नगद पुरस्कार, विशेषज्ञ परामर्श र लगानीकर्तासँगको सम्पर्क बढाउने एक प्रगतिशील प्लेटफर्म पनि रहेको बताइएको छ।
यस वर्षको बलियो सुरुवातले अर्को सफल संस्करणको संकेत गरेको छ।
प्रतियोगिताका आगामी चरणहरू र थप जानकारीका लागि एनवाइइएफका सूचनाहरू निरन्तर अवलोकन गर्न फोरमले अनुरोध गरेको छ। नेपाली स्टार्टअपहरूको महत्वाकांक्षालाई निरन्तर समर्थन गर्ने प्रतिबद्धता एनवाइइएफले व्यक्त गरेको छ।
