प्रतिपक्षी दलहरू राष्ट्रिय स्वतन्त्र पार्टी र राष्ट्रिय प्रजातन्त्र पार्टीका सांसदहरू आज पनि प्रतिनिधि सभामा आफ्ना कुरा राखेर बाहिरिएका छन्।
रास्वपाबाट प्रमुख सचेतक सन्तोष परियारले बोलेका थिए भने राप्रपाबाट सांसद रोशन कार्कीले बोलेकी थिइन्।
भिजिट भिसा प्रकरणमा गृहमन्त्री रमेश लेखकले पदबाट राजीनामा दिनुपर्ने भन्दै रास्वपा र राप्रपाले आफ्ना कुरा राख्ने र सदनबाट बाहिरिने गर्दै आएका छन्।
रास्वपाले आजको बैठकमा सत्तापक्षले सार्वभौम संसदको उपहास गर्दै उपसभामुख ईन्दिरा रानामगरको अमूल्यन गरेको बताएको छ।
बुधबारको प्रतिनिधि सभा बैठकमा बोल्दै रास्वपाका प्रमुख सचेतक सन्तोष परियारले कार्यपालिकाले सार्वभौम संसदमाथि बारम्बार आक्रमण गरेको टिप्पणी गरे।
‘हिजो बालुवाटार र सिंहदरबारमा जुन किसिमको प्रहर्सन भयो, त्यसले सम्मानित सदनलाई चोट पुर्याएको छ। लोकतन्त्रको विरासत धानेका भन्नेहरूले सदनको, सार्वभौम संसदको उपसभामुखजस्तो जिम्मेवार पदलाई जुन तहको अवमूल्यन गरेका छन्, यो लोकतन्त्रका लागि निकै ठूलो खतरा भएको छ भन्ने राष्ट्रिय स्वतन्त्र पार्टीका ठम्याइ हो,’ उनले भने, ‘म बिपी कोइरालालाई सम्झना चाहन्छु्, लोकतन्त्र बचाउनका लागि हार्न तयार हुने बिपीलाई फर्किएर हेर्न म कांग्रेसका नेताहरूलाई आग्रह गर्छु। म मदन भण्डारीलाई सम्झना चाहन्छु, सामन्तवादलाई मात्र होइन पार्टीभित्र हाबी भएको सामन्तवादमा पनि हामीलाई उँभो लाग्न दिँदैन भन्ने मदनलाई सम्झन म एमालेका नेताहरूलाई म आग्रह गर्न चाहन्छु।’
अन्तर्राष्ट्रिय रूपमा ख्यातीप्राप्त भएकाले ईन्दिरा रानामगरको भूमिकालाई सम्मान गर्दै रास्वपाले उपसभामुख बनाएको उनले बताए।
‘एउटा जनजाति महिला, रास्वपाले उहाँको सम्मानलाई सम्मान गर्दै, अन्तर्राष्ट्रियस्तरमा उहाँले पाउनुभएको सम्मान गर्दै, यो सभामा नेपालको प्रतिनिधित्व होस् भनेर, यो लोकतन्त्रमा, तपाईंहरूले ल्याएको भनिएको लोकतन्त्रको उहाँको सम्मान होस् भने ल्याएका हौं। उहाँले जति अन्तर्राष्ट्रिय सम्मान पाउनुभएको छ, तपाईंहरू जति उफ्रिए पनि त्यति माथि पुग्न सक्नुहुन्न भन्ने हाम्रो ठम्याइ हो,’ उनले भने।
रास्वपा प्रमुख सचेतक परियारले विवेकलाई बन्धक नबनाउन सांसदहरूलाई आग्रह गरे। सांसद आफै सार्वभौम भएकाले उनीहरूको विवेकलाई बन्धक बनाउन नहुने उनको धारणा थियो।
‘विवेकलाई हस्ताक्षरमा परिणत गरेर जुन बेला पायो त्यही बेला, राजनीतिक स्वार्थपूर्ति गर्ने त्यो एउटा मुद्दा नबनाऊँ भन्न चाहन्छु,’ उनले भने।
राष्ट्रिय स्वतन्त्र पार्टीलाई निषेध गर्न खोजिएको उनले बताए।
‘नयाँहरूलाई निषेध गर्न सकिँदैन। समाज विज्ञानले प्रमाणित गरेको कुरा हो, कुनै पनि नयाँहरू समाजले निषेध गर्न सक्दैन। हामीले कमजोर बनाउन खोजिएला, तर हामीलाई निषेध गर्न सकिँदैन। कार्यपालिकाले व्यवस्थापिकामाथि बारम्बार गरेको आक्रमण कसरी सहने!,’ उनले भने।
राप्रपाकी सांसद रोशन कार्कीले भने कांग्रेस र एमालेका सांसदहरूले गरेको हस्ताक्षरप्रति टिप्पणी गरेकी थिइन्। संवैधानिक परिषदमा बहुमत जुटाउन उपसभामुखलाई हटाउन खोजिएको उनको भनाइ थियो।
‘खाली कागजमा हस्ताक्षर गराउने कस्तो पार्टी, हस्ताक्षर गर्ने कस्ता सांसद?, धिक्कार छ,’ उनले भनेकी थिइन्। उनको यो अभिव्यक्तिप्रति एमाले सांसद सूर्य थापाले उठेर नियमापत्ति जनाएका थिए। ‘यो अभिव्यक्ति संसद नियमावलीविपरीत छ, रेकर्डबाट हटाइयोस्, कहाँ हस्ताक्षर गर्नुपर्छ भन्ने कुरा हामी सार्वभौम सांसदलाई थाहा छ,’ थापाले भनेका थिए।
-1742801159.jpg)
-1746009348.jpg)
