नेपाली कांग्रेसका महामन्त्री गगन थापाले ७ बुँदे सहमतिअनुसार प्रधानमन्त्री केपी शर्मा ओलीले कांग्रेसलाई प्रधानमन्त्री छाड्ने हो कि होइन भन्ने अलमलबाट मुक्त हुनुपर्ने बताएका छन्।
२०८१ असार १७ गते कांग्रेस र एमालेबीच ७ बुँदे सहमति हुँदा आलोपालो प्रधानमन्त्री बन्ने सहमति थियो। जसअनुसार केपी शर्मा ओली २०८१ असार ३० गते प्रधानमन्त्री नियुक्त भएका थिए। अब ओलीले २०८३ असारपछि कांग्रेस सभापति शेरबहादुर देउवालाई प्रधानमन्त्री छाड्नुपर्ने दुई दलबीचको आलोपालो सहमतिमा उल्लेख छ।
‘यो बेलामा नेपाली कांग्रेस पार्टी केबाट मुक्त हुनुपर्छ भने २०८४ सालमा मेरो अवस्था के होला भन्ने कुराबाट मुक्त हुनुपर्छ। यसपछि प्रधानमन्त्री आलोपालो भनेर प्रधानमन्त्री केपी शर्मा ओलीले जुन भन्नुहुन्छ नि त्योबाट मुक्त हुनुपर्छ,’ थापाले काठमाडौंमा सोमबार भएको एक कार्यक्रममा बोल्दै भने, ‘उहाँले हामीलाई सम्झाउनु हुन्छ नि! उहाँले छोड्नुहोला कि नहोला भन्ने अलमलबाट हामीले मुक्त हुनुपर्छ।’
महामन्त्री थापाले पार्टीले गर्नुपर्ने कर्म सबै प्रकारको लोभ र डरबाट मुक्त भएर गर्नुपर्ने बताए। ‘कांग्रेसका सबै कार्यकर्ता पनि लोभ र डरबाट बाहिर निस्कनुपर्नेछ,’ उनले भने।
(न्युज एजेन्सी नेपाल)
-1756118929.jpeg)
-1746009348.jpg)
