सुर्खेतमा जातीय विभेद गरेको आरोपमा एक जना पक्राउ परेका छन्।
दैलेख आठबिस नगरपालिका-६ घर भई वीरेन्द्रनगर नगरपालिका-७ बस्ने ३९ वर्षीय शेरबहादुर थापा पक्राउ परेका हुन्।
उनलाई जिल्ला प्रहरी कार्यालयको टोलीले सोमबार पक्राउ गरेको हो।
उनीविरूद्ध वैशाख ११ गते जातीय विभेद तथा छुवाछुतसम्बन्धी कसुरमा उजुरी परेको थियो। सोही आधारमा उनलाई नियन्त्रणमा लिइएको जिल्ला प्रहरी कार्यालय प्रहरी नायव उपरीक्षक (डिएसपी) मोहनजंग बुढथापाले जानकारी दिए।
उनका अनुसार थापाले वैशाख १० गते साँझ सामाजिक सञ्जालमा लेखिएको एक स्टाटसमा 'जातीय विभेद' सम्बन्धी टिप्पणी गरेको आरोप छ।
उक्त टिप्पणीलाई लिएर आरोपित विरुद्ध जातीय विभेदको उजुरी परेको उनले बताए। यस घटनामा जिल्ला अदालतबाट जातीय भेदभाव तथा छुवाछुत मुद्दामा ५ दिन म्याद थप गरेर अनुसन्धान भइरहेको छ।
