शनिबार भएको रोमाञ्चक फाइनलमा विश्व नम्बर एक आर्यना सबालेन्कामाथि उत्कृष्ट पुनरागमन गर्दै कोको गफले आफ्नो करियरको पहिलो फ्रेन्च ओपन महिला एकल उपाधि जितेकी छिन्।
अमेरिकी दोस्रो वरीयताकी गफले डब्ल्यूटीए टुरका दुई शीर्ष खेलाडीबीचको तनावपूर्ण प्रतिस्पर्धापछि ६-७ (५-७), ६-२, ६-४ को जित हासिल गर्दा इतिहास रच्न सफल भइन्।
२१ वर्षीया गफको करियरको यो दोस्रो ग्रान्डस्लाम जित हो। यसअघि २०२३ मा उनले युएस ओपनको उपाधि जित्दा पनि बेलारुसकी सबालेन्कालाई नै पराजित गरेकी थिइन्।
खेलमा खराब सुरुवात गरेकी गफ 'डबल ब्रेक' ले पछि परेकी थिइन्। तर, उनले अन्ततः आफ्नो लय समातिन् र २७ वर्षीया सबालेन्काले गरेका धेरै गल्तीको फाइदा उठाइन्।
पहिलो दुई सेटमा चलेको तेज हावाले सर्भिसमा निकै समस्या पारेको थियो, जसका कारण खेल उच्चस्तरीय नभए पनि मनोरञ्जनात्मक बन्यो र दुवै खेलाडीले कुल १२ पटक एकअर्काको सर्भिस 'ब्रेक' गरे।
दर्शकदीर्घामा उनका आमाबुबा क्यान्डी र कोरी खुसीले नाचिरहँदा गफले सबालेन्कासँग आत्मीय अंकमाल गरिन् र त्यसपछि कोर्टबाट दौडिएर आफ्नो परिवारसँग खुसी साट्न गइन्।
