आइसिसी एकदिवशीय विश्वकप क्रिकेटमा दक्षिण अफ्रिकाले इंग्ल्यान्डसामु ४०० रनको विशाल लक्ष्य प्रस्तुत गरेको छ।
शनिबार मुम्बईको वांखडे स्टेडियममा जारी खेलमा दक्षिण अफ्रिकाले ७ विकेटको क्षतिमा ३९९ रन जोडेको हो।
हेनरिच क्लासेनको शतकमा दक्षिण अफ्रिकाले इंग्ल्यान्डसामु विशाल लक्ष्य प्रस्तुत गर्न सफल भएको हो। क्लासेनले ६७ बलमा १०९ रन बनाएका छन्। जसमा १२ चौका र ४ छक्का प्रहार गरे।
रिजा हेन्ड्रिक्सले पनि ८५ रन जोडेका छन्। उनले ७५ बलमा उक्त रन बनाएका हुन्। उनले ९ चौका र ३ छक्का प्रहार गरे।
यस्तै मार्को जेनसेनले अविजित रही ४२ बलमा ७५ रन र रासी भान डेर डुसेनले ६१ बलमा ६० रन बनाए।
एइडन मारक्रम ४२ रन बनाएर आउट भएका थिए। अन्य खेलाडीहरूले दुई अंकको रन बनाएनन्।
बलिङतर्फ इंग्ल्यान्डका लागि रिस टप्लेले तीन विकेट, गस एट्किन्सन र अदिल रसिदले २-२ विकेट लिएका हुन्।
