आइसिसी एकदिवसीय क्रिकेट विश्वकपमा आज घरेलु टिम भारत र अस्ट्रेलियाबीच खेल हुँदैछ। अहमदाबादस्थित नरेन्द्र मोदी रंगशालामा हुने खेलमा अस्ट्रेलियाले टस जितेर बलिङ रोजेको छ।
१ लाख ३० हजार दर्शक आउटने रंगशाला हुने खेलका लागि दुवै टिमले कुनै खेलाडी परिवर्तन गरेका छैनन्।
आजको खेल अहमदाबादको पिच नम्बर पाँचमा हुन लागेको हो। यो पिच भारत र पाकिस्तानबीच प्रतिस्पर्धा भएको पिचभन्दा फरक हो।
रवि शास्त्रीकाअनुसार यो पिच सुख्खा देखिएको छ। स्पिनरका लागि पिचले फाइदा हुने उनको विश्लेषण छ। उनका अनुसार पहिले ब्याटिङ गरेर ठूलो स्कोर बनाउने टिमका लागि खेल सजिलो हुने देखिन्छ।
खेलमा अस्ट्रेलियाका लागि स्पिनर एडम जाम्पा महत्वपूर्ण सावित हुने विश्वास गरिएको छ।
जारी विश्वकपमा यो मैदानमा चार खेल भएका छन्। जसमा लक्ष्य पछ्याउने टिमले तीन खेल जितेका छन्। जारी विश्वकपको खेलमा यो मैदानमा ब्याटिङ पहिले गरेर जित्ने टिम अस्ट्रेलिया मात्र हो।
भारतीय टोलीले अहमदाबादमा कुल १९ खेल खेलेको छ। भारतले यहाँ ११ खेल जितेको छ भने ८ खेलमा हार बेहोरेको छ। अस्ट्रेलियाले यो मैदानमा कुल ६ खेल खेलेको छ जसमध्ये ४ मा जित र २ हार बेहोरेको छ।
मैदानमा अहिलेसम्म ३२ खेल भएका छन्। जसमध्ये १७ खेलमा पहिले ब्याटिङ गर्ने टोलीले जित हासिल गरेको छ भने १५ खेलमा पछ्याउने टोलीले जित हासिल गरेको छ। यस मैदानमा पहिलो इनिङ्समा औसत स्कोर २३७ रहेको छ भने दोस्रो इनिङ्समा औसत स्कोर २०७ रहेको छ।
