प्रधानमन्त्री कप एकदिवसीय राष्ट्रिय क्रिकेट प्रतियोगितामा गण्डकी प्रदेशका अर्जुन कुमालले शतक प्रहार गरेका छन्।
सोमबार मधेश प्रदेशविरूद्धको खेलमा अर्जुनले शतक प्रहार गरेका हुन्। उनले १०६ रन बनाए। १४० बल खेलेका अर्जुनले १० चौका र १ छक्का प्रहार गरे।
जारी प्रतियोगितामा यो चौथो शतक हो। यसअघि सुदूरपश्चिमक किरण ठगुन्नाले दुई शतक प्रहार गर्दा त्रिभुवन आर्मी क्लबका त्रृतराज दासले शतक प्रहार गरेका थिए।
अर्जुनले शतक प्रहार गरे पनि गण्डकीले जित निकाल्न सुपर ओभर कुर्नु पर्यो। सुपर ओभरमा पहिले ब्याटिङ गरेको गण्डकीले २२ रन बनाउँदा मधेसले ९ रन मात्र जोड्न सक्यो।
गण्डकीका लागि मधेस अर्जुन बाहेक अरु ब्याटरले उल्लेख योगदान गर्न सकेनन्।
गण्डकीलाई जितका लागि अन्तिम बलमा दुई रन चाहिएको थियो। बलिङमा मधेस विशाल पटेल थिए। ब्याटिङमा गण्डकी सन्दीप पराजुली थिए। अन्तिम विकेट बाँकी रहेको अवस्थामा विशालले वाइड फ्याँक्दा स्कोर बराबरी भएको थियो। तर रनका लागि दौडिदा सन्दीप रनआउट हुँद गण्डकी अलआउट भएको हुँदा उसले मधेसले जति नै २४६ रन जोड्यो।
त्यसअघि टस जितेर पहिले ब्याटिङ गरेको मधेसले ७ विकेटको क्षतिमा २४६ रन जोड्यो। मधेसका लागि तीन ब्याटरले अर्धशतक प्रहार गरे।
ओपनर रोहन विकले ६४ रन जोडे भने हरिशंकर साहले ५१ रन बनाए। रुपेश सिंहले ३२ बलमा नटआउट ५१ रन बनाए।
बलिङमा गण्डकीका विपिन खत्री र कमल परियारले २-२ विकेट लिन सफल भए। आज जित हात पारेसँगै गण्डीकले पुछारको स्थान छाड्न सफल भयो। उसले सबै खेल खेल्दा ४ अंक जोड्यो। अन्तिम दुई खेल बाँकी छदा मधेसको पनि ४ अंक छ।
