प्रधानमन्त्री कप एकदिवसीय राष्ट्रिय क्रिकेट प्रतियोगिताअन्तर्गत यो सिजनको लिग चरणका खेल सकिएका छन्।
बिहीबार रुपन्देहीको सिद्धार्थनगरमा बागमती प्रदेशमाथि मधेस प्रदेशले ४ विकेटको जित निकालेसँगै लिग चरणका ४५ खेल सकिएका हुन्। लिग चरणमा सबै टोलीले नौ नौ खेल खेले।
लिग चरणमा आठ-आठ खेल जितेका शीर्ष स्थानको नेपाल पुलिस क्लब र दोस्रो स्थानको त्रिभुवन आर्मी क्लबले शनिबार उपाधिका लागि प्रतिस्पर्धा गर्दैछन्। दुवैले १६-१६ अंक जोड्दा रनरेटमा पुलिस अघि रह्यो।
सशस्त्र प्रहरी बलको एपिएफ क्लब नौ मध्ये सात खेल जित्दै १४ अंक जोडेर तेस्रो भयो। अन्तिम खेलमा मधेस प्रदेशसँग ४ विकेटले पराजित भए पनि बागमती प्रदेश चौथो भयो। अब पुलिस, आर्मी, एपिएफ र बागमतीले यो सिजनको जय ट्रफी एलिट कप बहुदिवसीय प्रतियोगिता खेल्नेछन्।
बागमती जति नै ८-८ अंक जोडेका पाँचौ स्थानको कर्णाली प्रदेश, छैटौं स्थानको लुम्बिनी प्रदेश र सातौं स्थानको मधेस प्रदेश भने रनरेटमा पछि परे।
तीन खेल जितेर ६ अंक जोडेको सुदुरपश्चिम आठौं भयो भने दुई खेलबाट ४ अंक जोडेको गण्डकी नवौं स्थानमा रह्यो। एक खेल मात्र जितेको कोशी प्रदेश भने अंक तालिकाको पुछार अर्थात् दशौं स्थानमा रह्यो। कोशीले एक मात्र जित गण्डकी प्रदेशविरूद्ध निकाल्यो।
