जिम्बाब्वेको वित्तीय संस्था सिएबिएसले जिम्बाब्वे क्रिकेटलाई ५० हजार अमेरिकी डलर बराबरको प्रायोजन सहयोग प्रदान गरेको छ। यो रकम देशका पाँच प्रथम श्रेणीका प्रान्तीय टोलीलाई प्रत्यक्ष रूपमा सहयोग गर्न उपलब्ध गराइनेछ।
जिम्बावे क्रिकेटले जारी गरेको विज्ञप्ति अनुसार प्रायोजन रकम लोगान कप, प्रो५० च्याम्पियनसिप र घरेलु टी-२० प्रतियोगितामा प्रतिस्पर्धा गर्ने पाँच टोलीहरू— इगल्स, राइनोज, टस्कर्स, माउन्टेनियर्स र साउदर्न रक्सलाई सोझै हस्तान्तरण गरिनेछ।
विज्ञप्तिमा उल्लेख भएअनुसार ‘सिधै टोलीलाई रकम उपलब्ध गराउने मोडेल’ले टोलीहरूलाई प्रशिक्षण, प्रतिभा विकास र खेलाडी कल्याण जस्ता महत्त्वपूर्ण क्षेत्रमा लगानी गर्न मद्दत गर्नेछ।
सिएबिएसको क्रिकेटसँग लामो समयदेखिको सहकार्य छ। उसको सहयोग सन् २००४ मा टी-२० प्रतियोगिताहरूलाई सहयोग गरेबाट सुरु भएको थियो। विगत दुई दशकदेखि संस्थाले चुपचाप तर निरन्तर रूपमा क्रिकेट विकासका पहललाई सहयोग गर्दै आएको र देशभरका उदीयमान प्रतिभाहरूलाई पहिचान गर्न तथा उनीहरूको क्षमता निखार्न मद्दत गरिरहेको विज्ञप्तिमा उल्लेख छ।
यो प्रायोजन सम्झौता जिम्बाब्वे क्रिकेटका लागि एक व्यस्त र सफल वर्षको बीचमा भएको हो। यस वर्ष जिम्बाब्वेले सातवटा टेस्ट खेलिसकेको छ भने हालै दक्षिण अफ्रिका र न्युजिल्यान्ड सम्मिलित टी-२० त्रिकोणात्मक शृङ्खला पनि आयोजना गरेको थियो। साथै, जुलाई ३० देखि न्युजिल्यान्डसँग दुईवटा टेस्ट खेल आयोजना गर्ने तयारीमा छ।
-1746009348.jpg)
