बजारमा डण्डीको मूल्य बढेको छ।
कम्पनीले १५ दिनको बीचमा चार पटकसम्म डण्डीको मूल्य बढाएको नेपाल निर्माण सामग्री व्यापार संघ, काठमाडौंका सल्लाहकार अनसन साखःले जानकारी दिए।
'के कारणले बढाएको भन्दैनन्, बढाएको बढाइ मात्रै गर्छन्,' उनले भने।
उनका अनुसार डण्डी उत्पादक कम्पनीहरूले फागुन २० गतेबाट डण्डीको मूल्य बढाउन सुरू गरेका हुन्।
त्यसअघि डण्डीको कारखाना मूल्य प्रतिकिलो भ्याट बाहेक ७८ रूपैयाँ थियो।
फागुन २० गते प्रतिकिलो दुई रूपैयाँ बढाएर ८० रूपैयाँ पुर्याए।
त्यसैगरी फागुन २५ गते पुनः प्रतिकिलो तीन रूपैयाँ बढाएर ८३ रूपैयाँ पुर्याएकोमा तुरून्तै २८ गते बढाएर ८६ रूपैयाँ पुर्याए।
चैत लागेसँगै सोमबारबाट लागु हुने गरी पुनः प्रतिकिलो चार रूपैयाँ बढाएर ९० रूपैयाँ पुर्याएको उनको भनाइ छ।
उनका अनुसार यो भ्याट बाहेकको कारखाना मूल्य हो।
त्यसमा कारखानाबाट काठमाडौंसम्मको ढुवानी तथा लोड–अनलोड भाडा प्रतिकिलो तीन रूपैयाँ ५० पैसा जोडिन्छ।
बढेको मूल्य अनुसार उपभोक्तालाई डण्डीको मूल्य प्रतिकिलो एक सय ६ रूपैयाँ पर्न आउने उनी बताउँछन्।
चैतदेखि जेठसम्म निर्माणका काम हुने भएकाले मूल्य बढाइएको हुन सक्ने उनी बताउँछन्।
'अब दिन लामो भयो। पानी पनि पर्दैन। यो समयमा निर्माणका काम सुरू हुन्छ,' उनले भने, 'बजारमा निर्माण सामग्रीको माग हुने भएकाले उद्योगीले मूल्य बढाएका हुन्।'
उनका अनुसार अहिले सरकारी काम र हाइड्रोपावर निर्माणका कामहरू भइरहेको छ।
सिमेन्टको मूल्य पनि उद्योगीले गत कात्तिकबाट बढाएका हुन्।
अहिले बजारमा ओपिसी सिमेन्ट प्रतिबोरा ८ सय २० देखि ८ सय ५० र ओपिसी ७ सयदेखि ७ सय ३० रूपैयाँ छ।
त्यस्तै, इँटा, गिटी–बालुवाको मूल्य भने स्थिर छ।
