नेपाल एयरलाइन्सको अन्तिम बोइङ किन्नका लागि एक कम्पनीले ५७ लाख १० हजार अमेरिकी डलर कबोल गरेको छ।
एयरलाइन्सले बिक्रीका लागि सुरु गरेको बोल कबोलबाट एक कम्पनीले सबैभन्दा बढी कबोल गरेको छ।
यो प्रक्रियामा तीन कम्पनी सहभागी भएका छन्।
२७ वर्ष पुरानो १९० सिट क्षमताको बोइङ विक्री गर्न एयरलाइन्सले सुरू मूल्यांकनमा करिब आधा मूल्य घटाएको थियो।
परामर्शदाता नियुक्त गरेर जहाजको मूल्यांकनसहित एयरलाइन्सले गएको असारमा विश्वव्यापी टेन्डर आह्वान गरेको थियो। त्यसमा कोही पनि नआएपछि एयरलाइन्सले फेरि असोजमा टेन्डर प्रकाशित गरेको थियो।
एयरलाइन्सले यो पटकका लागि जहाजको न्यूनतम मूल्य ४८ करोड ७२ लाख रुपैयाँ (४२ लाख ५० हजार अमेरिकी डलर) तोकेको थियो। प्रत्यक्ष सम्झौताबाट छिनोफानो हुने यो लिलामीमा जसले बढी कबोल गर्छ उसैले जहाज पाउने छ। यही बोलकबोलमा एक कम्पनीले ५७ लाख डलर (करिब ६५ करोड रुपैयाँ) कबोल गरेको हो। कम्पनीको नाम भने अझै खुलाइएको छैन।
बोइङ ७५७ जहाजमा २ ओटा रोल्सरोयसका इन्जिन छन्। योसँगै जहाजका लागि स्टक पाटपुर्जा पनि किन्नेले पाउने छ।
सुरूमा एयरलाइन्सले जहाजको न्यूनतम मूल्यांकन ७६ लाख ७६ हजार अमेरिकी डलर हुने बताएको थियो। सोहीअनुसार पहिलो र दोस्रो टेन्डर पनि निकालिएको थियो। यो पटक सुरू मूल्यको ४४ प्रतिशत न्यूनतम मूल्य घटेको थियो। तर त्यसमा बढाबढ गर्दा आधार मूल्यमा केही थपिएको छ।
‘९एन-एसिबी’ नेपाली दर्ता नम्बर भएको गण्डकी नामको यो जहाजले हालसम्म ८९ हजार घण्टा उडिसकेको छ। एयरलाइन्सले यो जहाजबाट व्यावसायियक उडानमा लाभ घट्दै गएपछि विक्री गर्ने निर्णय गरेको थियो।
-1746009348.jpg)
