अन्तर्राष्ट्रिय सम्बन्ध र पर्यटन समितिले संस्कृति, पर्यटन तथा नागरिक उड्डयन मन्त्रालयलाई 'आइकाओ'को रिपोर्ट एक हप्ताभित्र समितिमा पेस गर्न निर्देशन दिएको छ।
बिहीबार प्रतिनिधि सभा अन्तर्गतको अन्तर्राष्ट्रिय सम्बन्ध र पर्यटन समितिको बैठकले मन्त्रीलाई यस्तो निर्देशन दिएको हो।
समिति बैठकमा बोल्दै समिति सभापति राजकिशोर यादवले मन्त्री बद्रीप्रसाद पाण्डेलाई सन् २०२२ को रिपोर्ट एक हप्ताभित्र आइकाओको रिपोर्ट समितिमा पेस गर्न निर्देशन दिए।
उनले समितिको अर्को बैठकमा मन्त्री उपस्थित हुँदा समितिले दिएका सम्पूर्ण निर्देशन लिखित रूपमा ल्याउन सभापति यादवले निर्देशन दिए।
उनले प्राधिकरण टुक्राउने विधेयक कहाँ कस्तो अवस्थामा रहेको हो? सो बारेमा समितिलाई जानकारी उपलब्ध गराउन पनि निर्देशन दिए।
उनले कोरिया जाने नेपाली कामदारको आउजाउमा कोरियन एयरलाइन्सको विकल्प लगायतका विषयमा आगामी बैठकमा कार्ययोजनासहित उपस्थित हुन मन्त्रीलाई निर्देशन दिए।
उनले यति एयरलाइन्स दुर्घटनाको छानबिन रिपोर्ट अर्को बैठकमा उपलब्ध गराउन निर्देशन दिए। उनले ईयूको कालो सूचीबाट नेपाल नहट्नु पछाडिको कारण र त्यसमा क–कसको चलखेल भएको हो स्पष्ट तथ्य पेस गर्न समेत निर्देशन दिए।
उनले भने,‘आइकाओको प्रतिवेदन समितिलाई पठाउन पर्यटन मन्त्रालयलाई पत्र नै लेखेको छ। अब समितिले पत्र लेख्न नपरोस्। अबको एक हप्ताभित्र समितिलाई प्रतिवेदन उपलब्ध गराउन मन्त्रालयलाई निर्देशन गर्दछु। प्राधिकरण विधेयक कहाँ छ। कुन अवस्थामा छ। मन्त्रीको पहल कदमीमा मन्त्रिपरिषदबाट सदनमा आउन सक्छ कि सक्दैन। मन्त्रीलाई प्राधिकरण विधेयकमा समस्या भयो। समितिलाई जानकारी गराउनुस् प्रधानमन्त्रीसँग कुरा गर्नुपरे पनि समितिले कुरा गर्नेछ। अर्को बैठकमा आउँदा उक्त विधेयकको विषयमा सही जानकारी गराउनुपर्यो। इयु सेफ्टी लिस्टको विषयमा डेढ वर्ष भयो। अब हामीले रिजल्ट हेर्ने हो। अर्को बैठकमा आउँदा इयु सेफ्टिलिस्टमा कति दिनमा हामी च्याम्पियन हुन्छौं। तयार गरेर आउन मन्त्रीलाई निर्देशन गर्दछु।’
उनले अगाडि भने, ‘कोरियन एयरलाइन्सको विषय दुई देशको कुरा हो। कोरियन एयरलाइन्स नेपाल आउने तर नेपाली एयरलाइन्स कोरिया जान केके गर्नुपर्छ। नेपालको जहाज कोरिया कसरी जाने त्यो सम्बन्धी केके गर्नुपर्छ र मैले यसरी गर्दैछु भन्ने कार्ययोजनासहित आउन मन्त्रीलाई निर्देशन गर्दछु।’
उनले त्रिभुवन अन्तर्राष्ट्रिय विमानस्थलभित्र पसलहरू राख्ने दिएको सम्झौताहरु एक हप्ताभित्र समितिलाई उपलब्ध गराउन निर्देशन दिनु भयो । —न्युज एजेन्सी नेपाल
