अमेरिकाले युक्रेनमा शान्ति सम्झौताका लागि उसले आफ्नो केही भूभाग त्याग्नुपर्ने हुन सक्ने बताएको छ।
मंगलबार अमेरिकी र युक्रेनी अधिकारी युद्ध अन्त्यका लागि साउदी अरबमा वार्तामा बस्दैछन्। त्यसका लागि जेद्दा जानुअघि अमेरिकी विदेशमन्त्री मार्को रूबिओले पत्रकारहरूसँगको कुराकानीमा रूबिओले युद्ध अन्त्यका लागि युक्रेनले केही भूभाग त्याग्नुपर्ने बताएका हुन्।
रूसले पनि केही त्याग गर्नुपर्ने उनले बताए।
'युद्ध अन्त्यका लागि रूस र युक्रेन दुवै कठिन निर्णयका लागि तयार हुनुपर्छ,' उनको भनाइ उद्धृत गर्दै अमेरिकी पत्रिका द न्युयोर्क टाइम्सले लेखेको छ।
उनले यसलाई अझै प्रष्ट पार्दै सन् २०१४ यता रूसले कब्जा गरेको भूभागहरू युक्रेनले छाड्नुपर्ने बताए।
'दुबै पक्षले यो अवस्थाको कुनै सैन्य समाधान छैन भन्ने कुरामा बुझ्नु आवश्यक छ,' रूबिओले भने, ' रुसले सम्पूर्ण युक्रेन जित्न सक्दैन र युक्रेनले पनि रूसलाई २०१४ को अवस्थामा फर्काउन सक्दैन।'
यसमा रूस के त्याग गर्न तयार छ भन्ने विषय भविष्यको वार्ताले निर्णय गर्ने रुबिओले बताएका छन्।
रुसले क्राइमिया सहित पाँचभन्दा बडी भूभागक कब्जा गरेको छ।
मंगलबार साउदी अरबको जेद्दामा अमेरिकी र युक्रेनी अधिकारीबीच भेटवार्ता हुँदैछ।
ह्वाइट हाउसमा १० दिनअघि अमेरिकी राष्ट्रपति ट्रम्प र उनका उपराष्ट्रपति जेडी भान्ससँग युक्रेनी राष्ट्रपति भोलोदिमिर जेलेन्स्कीको चर्काचर्की परेपछि दुई देशबीच पहिलो पटक औपचारिक संवाद हुन लागेको हो।
वार्तामा युक्रेनबाट जेलेन्स्कीका कर्मचारी प्रमुख, विदेश र रक्षामन्त्री तथा उच्च सैनिक अधिकारी छन्। अमेरिकाबाट विदेशमन्त्री, ट्रम्पका मध्यूर्व दूत लगायत उच्च अधिकारी रहनेछन्।
आजको वार्ताले शान्ति सम्झौता र प्रारम्भिक युद्धविरामको खाका तयार गर्नेछ। जेलेन्स्की सोमबार नै जेद्दा पुगेका थिए। यद्यपि उनी वार्तामा भने सहभागी हुने छैनन्। यसअघि नै साउदी भ्रमणमा जाने तय भएको थियो तर ह्वाइट हाउसको चर्काचर्कीपछि ट्रम्पले रूससँग साउदीमा वार्ता थालेपछि जेलेन्सकीले साउदी भ्रमण स्थगित गरेका थिए।
जेलेन्स्कीले पनि साउदीको वार्ताबाट ठोस परिणाम निस्कने आशा व्यक्त गरेका छन्।
साउदीको भेटवार्तामा खनिज सम्झौताबारे भने छलफल नहुने न्युयोर्क टाइम्सले जनाएको छ।
खनिज सम्झौतालाई ट्रम्पले युक्रेनलाई अमेरिकाले अहिलेसम्म गरेको सहयोगको भर्पाइका रूपमा लिएकाले त्यसलाई युद्धविरामको हिस्सा नमानिएको भनिएको छ।
खनिज सम्झौता रोकिएपछि ट्रम्पले युक्रेनमा सैन्य सहायता, गुप्तचर जानकारी आदानप्रदान र भू-उपग्रहले खिचेको तस्बिर आदानप्रदानमा रोक लगाएका छन्।
यद्यपि जेलेन्स्की आफै खनिज सम्झौता गर्न भने तयार भएको बताएका छन्।
उनले शान्ति सम्झौताको प्रारम्भिक रूपरेखाबारे पनि बताएका छन्।
जेलेन्स्कीले सुरुमा रुसले युक्रेनमाथि समुद्र र आकाशबाट गरिरहेको आक्रमण तत्काल रोक्नुपर्ने र कैदी आदानप्रदान गरिनुपर्ने बताएका थिए।
यसअघि बेलायल र फ्रान्सले गरेको अस्थायी युद्धविरामको प्रस्तावलाई रूसले अस्वीकार गरिदिएको थियो।
