लोकतान्त्रिक समाजवादी पार्टी नेपाल (लोसपा) का वरिष्ठ नेता अनिलकुमार झाले लोसपा छाडेका छन्।
उनले वरिष्ठ नेता र लोसपा साधारण सदस्यसमेतबाट राजीनामा दिएका हुन्। उनले पदबाट राजीनामा दिएको केही समय भए पनि यो खबर मंगलबार चर्चामा आएको हो।
सेतोपाटीसँग कुराकानी गर्दै अनिलकुमार झाले आफूले लोसपा छाडेको बताए।
‘मैले वरिष्ठ नेताबाट मात्र होइन, लोसपाको साधारण सदस्यतासमेत छाडिसकेको छु,’ उनले भने, ‘मैले दिएको राजीनामा स्वीकृत पनि भइसकेको छ, यो अलि पहिलाकै कुरा हो तर आज कसले बाहिर ल्याइदियो, चर्चा भइराखेको छ।’
हामीले झालाई लोसपा छाड्नुको कारण पनि सोध्यौं। उनले पहिलेदेखि नै लोसपामा बस्न मन नलागेको अवस्था रहेको बताए।
‘लोसपामा पहिलेदेखि नै बस्न मन लागेको थिएन,’ उनले भने। त्यसैले झा पछिल्लो समय लोसपाको सक्रिय राजनीतिबाट टाढा थिए।
अब राजनीति नै गर्ने कि अरू केही भन्ने प्रश्नमा झाको जबाफ छ, ‘म पुरानो मधेसवादी नेतामा पर्छु, राजनीति त गर्छु।’
उनले सद्भावना पार्टीमा समाहित हुने तयारी गरेका छन्।
यसबारे सोधिएको प्रश्नमा जबाफ दिँदै झाले भने, ‘सद्भावनालाई राष्ट्रिय जनता पार्टी (राजपा) मा मिसाइएको थियो। त्यो धेरै चल्न सकेन। त्यसपछि सबै आ-आफ्नो मातृ पार्टीतिरै फर्किएको देखेको छु, म पनि आफ्नो मातृ पार्टीमै सक्रिय हुन्छु।’
यसअघि लोसपाबाट नेता राजेन्द्र महतोले पनि विद्रोह गरेका थिए। महतोले राष्ट्रिय मुक्ति पार्टी दर्ता गरिसकेका छन्। लोसपाबाट महतोले विद्रोह गर्दा झाकोसमेत समर्थन थियो तर उनी त्यसपछि पनि लोसपामै थिए।
झाले नेपाल सद्भावना पार्टीमा विद्यार्थीकालदेखि नै राजनीति गरेका थिए। उनी सोही पार्टीमा पुन: आबद्ध हुने तयारीमा छन्।
-1746009348.jpg)
