लागुऔषधसहित दुई जना भारतीय नागरिक काठमाडौंमा पक्राउ परेका छन्। उनीहरू लाओसबाट नेपाल आएका थिए।
लागुऔषध नियन्त्रण ब्युरोको टोलीले त्रिभुवन अन्तर्राष्ट्रिय विमानस्थलबाट दुई जना भारतीय नागरिकलाई पक्राउ गरेको हो।
३५ वर्षीय फिरोज अहमद र ३२ वर्षीय मोलिस्वारन नानजुदामुरथी कुरानल भेल पक्राउ परेको प्रहरीको भनाइ छ।
ब्युरोको टोली विमानस्थलमा पनि खटिने गरेको छ। उक्त टोलीले हवाइमार्ग हुँदै काठमाडौं आउने व्यक्तिहरूको 'प्रोफाइलिङ' गर्ने गरेको छ।
त्यसैक्रममा गत शनिबार लाओसबाट बैंकक हुँदै काठमाडौं आएका अहमदलाई निगरानी गरिएको थियो। उनले सुटकेशमा कफी, चकलेटका प्याकेटहरू बोकेका थिए।
शंका लागेर ब्युरोको टोलीले जाँच गर्दा चार किलो सेतो हेरोइन बरामद भएको हो।
त्यस्तै ब्युरोकै टोलीले भेललाई भोलिपल्ट विमानस्थलमा फेला पारेको थियो। उनले पनि सोही प्रकृतिमा लागुऔषध ल्याएको फेला पारेको हो। उनीबाट थप तीन किलो ८०० ग्राम सेतो हेरोइन बरामद भएको थियो।
एसएसपी कृष्ण कोइरालाका अनुसार दुवै जना लागुऔषध बोक्न भरियाका रूपमा प्रयोग गरिएका व्यक्ति हुन्।
तस्करले विभिन्न तरिका अपनाएर लागुऔषध तस्करी गर्ने गरेको छ।
यसअघि पनि ब्युरोकै टोलीले लागुऔषधलाई हातले बुनेको झोलाभित्र पाइप बनाएर लागुऔषध भित्र्याएको खुलेको थियो।
अहिले पक्राउ परेका दुई जनालाई लागुऔषध नियन्त्रण ऐन, २०३३ अन्तर्गत काठमाडौं जिल्ला अदालतबाट म्याद थप गरी अनुसन्धान अघि बढाएको छ।
-1754385353.jpg)
-1746009348.jpg)
