आइसिसी यू-१९ विश्वकपको एसिया छनोटको आफ्नो तेस्रो खेलमा नेपालले हङकङलाई ११५ रनमा अलआउट गरेको छ।
बुधबार तल्लो मुलपानी मैदानमा टस जितेको नेपालले फिल्डिङ रोजेपछि पहिले ब्याटिङ गरेको हङकङ ४६.२ ओभरमा ११५ रनमा अलआउट भएको हो।
हङकङका लागि कप्तान शिव माथुरले ६३ रन बनाए। उनले ११६ बलमा ४ चौका र १ छक्का प्रहार गरे। आर्या पन्जावनीले १३ रन र वीर माथुरले १२ रन बनाउन सके।
बलिङमा नेपालका लेगस्पिनर युवराज खत्रीले चार विकेट लिए। उनले १० ओभरमा १८ रन खर्चिए भने ४४ बल त डट फ्याँके।
विपिनप्रसाद शर्माले ३ विकेट लिए। उनले ६.२ ओभरमा २४ रन खर्चिए। सन्तोष यादवको नाममा २ विकेट रह्यो।
यसअघि नेपालले पहिलो खेलमा युएई र दोस्रो खेलमा ओमानलाई पराजित गरेको थियो।
प्रतियोगितामा नेपालसहित अफगानिस्तान, हङकङ, ओमान र युएई सहभागी छन्।
यो छनोटको विजेता मात्र सन् २०२६ मा जिम्बावे र नामिबियामा हुने आइसिसी यू-१९ विश्वकपमा छनोट हुनेछ।
प्रतियोगितामा नेपालको मुख्य चुनौती अफगानिस्तान देखिएको छ। यद्यपी अरु टोलीसँगको हारले नेपालको यात्रा सकिन सक्छ।
नेपालले गत वर्ष दक्षिण अफ्रिकामा भएको विश्वकप खेलेको थियो। त्यसअघि नेपालले २००० देखि २००८ सम्म लगातार पाँचपटक विश्वकप खेलेको थियो। सन् २०१२ र २०१६ मा पनि खेल्दै नेपालले अहिलेसम्म आठ पटक युवा विश्वकप खेलिसकेको छ।
नेपालले अन्तिम खेलमा अफगानिस्तानसँग वैशाख ६ मा खेल्नेछ।
