सन् १९९३ मा कोपा अमेरिकाको उपाधि जितेपछि अर्जेन्टिना मुख्य प्रतियोगिताको पाँच फाइनल पुगेको थियो। जसमा लिओनल मेसीले चार फाइनलमा खेलेका थिए। तर ती सबै फाइनलमा उपाधि जित्न अर्जेन्टिना असफल भयो।
१९९३ यता अर्जेन्टिना र मेसी अभागी सावित भइरहे। क्लब फुटबलमा निरन्तर उत्कृष्ट प्रदर्शन गर्ने मेसीले अन्तर्राष्ट्रिय फुटबलमा अर्जेन्टिनाबाट राम्रो नखेलेका पनि होइनन्। तर उनी र उनको देश २८ वर्षसम्म अभागी सावित भए।
अर्जेन्टिनाले सन् १९९३ यता कोपा अमेरिकाको उपाधि जितेयता चार पटक र सन् १९८६ को विश्वकप जिते यता एक पटक फाइनलमा स्थान बनायो।
सन् २००५ मा १८ वर्षको उमेरमा हंगेरीविरूद्धको खेलबाट राष्ट्रिय टिममा डेब्यू गरेका मेसीले ठूला प्रतियोगितामा लगातार उपाधिविहीन भएपछि सन् २०१६ मा अन्तर्राष्ट्रिय खेलबाट संन्यास लिने घोषणा गरेका थिए।
तीन वर्षमा मेसीकै कप्तानीमा तीन ठूला प्रतियोगिताको फाइनलमा पुगेको अर्जेन्टिना सबैमा उपाधिविहीन भयो। त्यसैको चोटमा परेका मेसीले अन्तर्राष्ट्रिय खेलबाट विदा लिने अप्रत्यासित निर्णय गरेका थिए।
सन् २०१४ मा विश्वकप फुटबलको फाइनल पुग्यो तर जर्मनीसँग पराजित हुँदै उपविजेतामै सीमित भयो। विश्वकपमा उपाधिविहीन फर्किए पनि कोपा अमेरिकाको उपाधि जितेर विश्वकपमा लागेको घाउमा मल्हम लगाउने धुनमा रहेको अर्जेन्टिना फेरि २०१५ मा भएको कोपा अमेरिकाको फाइनलमा चुक्यो। आयोजक चिलीले पेनाल्टी सुटआउटमा मेसीको टोलीलाई पराजित गर्यो।
लगातार दोस्रो पटक मेसीकै कप्तानीमा कोपा अमेरिकाको फाइनल पुगेको अर्जेन्टिना फेरि २०१६ मा अभागी सावित भयो। अर्जेन्टिना समूह चरण र बाँकी खेलमा सानदार जित हात पार्दै फाइनल पुगेको टोली थियो, तर फाइनलमा फेरि तेस्रो पटक चुक्यो त्यो पनि मेसीकै कप्तानीमा, त्यो पनि चिलीसँगै हार्यो। अनि मेसीले तत्काल अन्तर्राष्ट्रिय खेल छाड्ने निर्णय लिएका थिए।
मेसीका लागि राष्ट्रिय टोलीमा सन् २००५ मा डेब्यु गरे यता सन् २००८ मा ओलम्पिकमा स्वर्ण र २० वर्ष मूनिको विश्वकप फुटबलको उपाधि अर्जेन्टिनाको जर्सीमा हासिल गरेको उपलब्धि मान्नु परेको थियो।
सन् १९८६ को विश्वकपको सेमिफाइनलमा इंल्याण्डविरुद्धको खेलमा डियगो म्याराडोनाले हातले गोल गर्दै अर्जेन्टिनालाई फाइनल पुर्याएका थिए। त्यतिबेला फाइनलमा जर्मनीलाई पराजित गर्दै अर्जेन्टिनाले विश्वकप फुटबलको उपाधि जित्यो। सायद इंग्ल्याण्डलाई हातले हानेको गोलको श्राप लाग्यो, अर्जेन्टिनाले त्यसपछि विश्वकप जित्न लामो समय कुर्न पर्यो।
सन् १९८६ को विश्वकपमा इंल्याण्डविरूद्धको खेलमा म्याराडोनाले हातले गोल गरेपछि उनले त्यो गोललाई आफैंले ‘ह्यान्ड अफ गड’ अर्थात् भगवानको हातको संज्ञा दिएका थिए।
विश्वकप जितेपछि फेरि फुटबलमा अर्जेन्टिनाको नयाँ युग सुरूभएको भनियो। तर मेसीको युगसम्म आउँदा अर्जेन्टिना उपाधिविहीन हुँदा समर्थकमा निराशाको बादल मडारिएको थियो। फाइनलमा पुगेर पनि सधै उपाधिविहीन हुने अभागी टोली सावित भयो र टोलीमा रहेका स्टार खेलाडी अभागी नै ठहरिए।
मेसी अर्जेन्टिनी राष्ट्रिय टिममा उदाएसँगै उनकै महत्वपूर्ण योगदानमा अर्जेन्टिना चार पटक फाइनल पुग्यो तर चारपटक हार्यो अर्थात उपाधिविहीन भयो।
मेसीले क्लबमा खेलेजस्तै खेल मुलुकका लागि खेल्दैनन् भन्नु एउटा महान खेलाडी माथि अन्याय हुन्छ। तर यो पनि सत्य हो, मेसीले जसरी आफ्नो क्लबलाई जित दिलाउने गरेका छन्, आफ्नो देशको सन्दर्भमा त्यतिकै अभागी ठहरिरहे।
मेसी स्वंयले क्लबमा राखेको कीर्तिमानी जस्तै अन्तर्राष्ट्रिय फुटबलमा अर्जेन्टिनाका लागि पनि राखेका छन्। मेसी अर्जेन्टिनाका लागि टप स्कोरर हुन् उनले खेलेका १८७ खेलमा १०९ अन्तर्राष्ट्रिय गोल गरेका छन्।
मेसीले सन् २०१६ मा संन्यास घोषणा गरेपछि उनलाई फुटबलमा फर्काउन समर्थकले अभियान नै थालेका थिए। ‘डन्ट गो, लियो’ भनेर थालिएको अभियान क्षणभरै संसारभर फैलिएको थियो।
पछि ब्युनोस आयर्स मेयरले मेसीको मूर्ती बनाएर मेसीलाई संन्यास फिर्ता लिन आग्रह गरेका थिए। मेसीलाई संन्यास फिर्ता लिनका लागि अर्जेन्टिनाको राजधानीमा एकैपटक ५० हजार दर्शक उपस्थिति भएका थिए। त्यसको एक सातापछि मेसीले संन्यास फिर्ता गरेका थिए।
१२ अगस्ट २०१६ मा संन्यास फिर्ता लिएका मेसीको काँधमा अर्जेन्टिनालाई सन् २०१८ को विश्वकप छनोट गराउने जिम्मा आएको थियो। विश्वकप छनोट जारी रहदा मेसी २०१७ मा चार खेलको अन्तर्राष्ट्रिय प्रतिबन्धमा परे। त्यसपछि अर्जेन्टिनाको विश्वकप छनोट यात्रा संकटमा पर्यो।
अर्जेन्टिना १९७० पछि विश्वकप मा छनोट नहुने अवस्था आउँदा मेसीमाथि सारा अर्जेन्टिनाका समर्थकको भरोसा थियो। तर महत्वपूर्ण खेलमा अर्जेन्टिनाले इक्वेइडरलाई ३-१ ले हरायो। खेलमा पछि परेको स्थिति उल्टाउने क्रममा मेसीले ह्याट्रिक गर्दै अर्जेन्टिनालाई विश्वकपमा पुर्याएका थिए।
सन् २०१८ को विश्वकपमा अर्जेन्टिनाको राम्रो सुरुवात हुन सकेन। पहिलो खेलमा अर्जेन्टिनालाई आइसल्यान्डले १-१ गोलको बराबरीमा रोकेको थियो। खेलमा मेसीले पेनाल्टीमा गोल चुकाउँदा अर्जेन्टिनाले जितबाट बिमुख बनेको थियो। दोस्रो खेलमा अर्जेन्टिनालाई क्रोएसियाले ३-० ले हरायो। अन्तिम खेलमा नाइजेरियालाई २-१ हराएर अर्जेन्टिनाले अन्तिम १६ मा स्थान पक्का गरेको थियो। तर अन्तिम १६ मा फ्रान्ससँग पराजित हुँदा अर्जेन्टिना विश्वकपबाट बाहिरियो।
अन्तर्राष्ट्रिय प्रतियोगितामा लगातार अफल भइरहेका मेसीका लागि कोपा अमेरिका २०१९ अर्को अवसर ठानिएको थियो। तर कोपामा पनि मेसी फेरि चल्न सकेनन्।
दुई वर्षपछि भने अर्जेन्टिना र मेसीको दिन आयो। कोपा अमेरिका २०२१ को उपाधि भिडन्तमा ब्राजिललाई १-० गोलले पराजित गर्दै अर्जेन्टिनाले २८ वर्षपछि तथा मेसीले पहिलो पटक उपाधि उचाल्न सफल भए। यससँगै मेसीले पहिलो उपाधि जित्ने धोको पूरा गरे।
सन् २०२२ मा मेसीले आफ्नो अन्तिम धोको पनि पूरा गरे। कतारमा भएको फिफा विश्वकप २०२२ को उपाधि जित्दै मेसीले आफ्नो जीवनकालमा सबै मुख्य प्रतियोगिताको उपाधि जितेर आफ्नो अन्तिम धोको पनि पूरा गरे।
३४ वर्षको उमेरमा मेसीले आफ्नो देशका लागि पहिलो मुख्य उपाधि जितेका थिए। ३७ वर्षको हुँदा मेसीले तीन वर्षमा तेस्रो उपाधि जित्न सफल भयो। सोमबार विहान अमेरिकाको मायमीस्थित हार्ड रक रंगशालामा कोलम्बियाविरूद्धको फाइनल जित्दै अर्जेन्टिनाले अर्को इतिहास रच्यो।
एक्स्ट्रा समयमा धकेलिएको खेलमा लाउटारो मार्टिनेजले निर्णायक गोल गर्दा अर्जेन्टिनाले कीर्तिमानी १६औं पटक कोपा अमेरिका जित्ने कीर्तिमान बनाउन सफल भयो। सन् २०२१ मा अर्जेन्टिनाले १५औं कोपाको उपाधि जितेर उरूग्वेको कीर्तिमान बराबरी गरेको थियो।
तेस्रो मुख्य उपाधिको फाइनल यात्रा भने मेसीका लागि सहज हुन सकेन। उनले चोटका कारण फाइनल खेल पूरा खेल्न सकेनन्। कोपा अमेरिका २०२४ मा मेसीले सेमिफाइनलमा क्याडनाविरुद्ध मात्र गोल गर्न सके। चिलीविरुद्धको समूह चरणको खेलमा घाइते भएका मेसीले पेरुविरुद्धको खेल गुमाएका थिए। फाइनलमा दोस्रो हाफमा बाहिरिन परेपछि मेसी निकै भावुक बनेका थिए। उनले मैदान छाड्दै गर्दा आँशु झारेका थिए।
३४ वर्षको उमेरसम्म उनले क्लबस्तरीय फुटबलमा स्पेनिस महारथी बार्सिलोनाबाट सबै मुख्य उपाधि जितिसकेका थिए। त्यसपछि फ्रेञ्च क्लब पिएसजीमा गएका मेसी हाल अमेरिकाको इन्टर मायमीमा आबद्ध छन्। ३४ वर्षको उमेरसम्म कहिल्यै देशका लागि मुख्य उपाधि जित्न नसकेका मेसीले २०२१ पछि तीन मुख्य उपाधि जितिसकेका छन्। अर्जेन्टिनाले पनि २८ वर्षसम्म कुनै उपाधि जित्न नसकेको खराब कीर्तिमान तोड्दै पछिल्लो तीन वर्षमा तीन उपाधि मात्र होइन कोपाको सर्वाधिक सफल टोलीको इतिहास समेत बनाएको छ।
३७ वर्षीय मेसीले अब आफ्नो खेल जीवनबारे कस्तो निर्णय गर्छन भन्ने संसारभर चासो छ। कोपा अमेरिका २०२४ अघि भने मेसीले सन् २०२६ को विश्वकपसम्म आफ्नो देशको लागि खेल्ने कि नखेल्ने भन्ने बारे निर्णय गर्न बाँकी रहेको बताएका थिए।
कोपा २०२४ मेसीको गति र शक्ति मैदानमा घट्दै गएको देखिएको छ। कोपा २०२४ मा उनले क्यानडाविरुद्ध सेमिफाइनलमा एक गोल गर्नुबाहेक अरु योगदान गर्न सकेनन्। मेसीले इक्वेडरविरुद्धको क्वार्टरफाइनलको पेनाल्टी सुटआउटमा पेनाल्टी मिस समेत गरेका थिए।
