लोकप्रिय गीत 'धोका दियौ तिमीले' नयाँ भर्सनमा सार्वजनिक भएको छ। द भ्वाईस अफ नेपाल सिजन ६ का फस्ट रनरअप रोशन राईको स्वरमा यो गीत सार्वजनिक भएको हो।
लुङ्टो क्रियशनको प्रस्तुति रहेको गीतलाई ३५ वर्षअघिकै संगीतकार शान्तिराम राईले संगीत गरेका छन्। यो गीतमा गीतकार बुद्धवीर लामाको शब्द छ। यस गीतको पुरानो भर्सनमा सरोज कुमार श्रेष्ठको स्वर थियो भने गायिका सुकमित गुरूङको स्वर थियो।
नयाँ भर्सन देवेश राईले एरेञ्ज गरेका हुन् भने कश्विर थापाले मिक्सिङ मास्टरिङ गरेका छन्। गीतमा रोशनसँगै गायिका मेलिना राईको स्वर छ।
सार्वजनिक गीतबारे बोल्दै प्राज्ञ शान्तिरामले आफ्नो ३५ वर्षअघिको संर्घष सम्झिए।
उनले भने, 'काठमाडौंको बसाइ, संघर्ष अनि अभावमा जन्मिएको थियो धोका दियौ तिमीले। यो गीत बाबु, छोरा र नाति पुस्ताहरूका लागि लोकप्रिय छ।'
गायक रोशनले कार्यक्रमलाई सम्बोधन गर्दै प्राज्ञ संगीतकार शान्तिरामलाई ढोगे। सदावहार लोकप्रिय गीत आफूलाई गाउन दिएकोमा धन्यवाद पनि भने।
गीतको म्युजिक भिडिओ पनि सार्वजनिक भएको छ। अभिनेत्री केकी अधिकारी र गायक रोशनको अभिनय भिडिओमा देख्न सकिन्छ।
