युट्युबर ड्राइभर रेशम भनेर चिनिएका रेशमराज पौडेलले धरौटी बुझाउन नसकेपछि कारागार पठाइएको छ।
शुक्रबार काठमाडौं जिल्ला अदालतका न्यायाधीश श्यामविहारी मौर्यको इजलासले पौडेलसँग पुर्पक्षको लागि ५० हजार रुपैयाँ धरौटी माग गरेको हो।
उक्त धरौटी बुझाउन नसकेपछि उनलाई थुनामा पठाइएको साइबर ब्युरोका प्रवक्ता एसपी दीपकराज अवस्थीले जानकारी दिए।
‘५० हजार धरौटी माग भएको थियो। तिर्न नसकेपछि थुनामा गएका छन्,’ उनले भने।
पौडेललाई जगन्नाथदेवलस्थित केन्द्रीय कारागार कार्यालयमा पठाइएको छ।
ड्राइभर रेशमविरूद्ध ब्युरोले साइबर अपराध अर्थात विद्युतीय कारोबार ऐन अन्तर्गत अनुसन्धान गरेको थियो।
उनीविरूद्ध सरकारी वकिलको कार्यालय काठमाडौंले बिहीबार काठमाडौं जिल्ला अदालतमा मुद्दा दायर गरेको हो। बागलुङ निसिखोलाका उनलाई प्रहरीले असार २ गते पक्राउ गरेको थियो।
उनलाई सिआइबीको सहयोगमा साइबर ब्युरोको टोलीले नेपालगञ्जबाट पक्राउ गरी काठमाडौं ल्याएको थियो।
उनले युट्युबमा अपशब्द प्रयोग गरी प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा, नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड', गृहमन्त्री रमेश लेखक लगायतलाई गाली गरी भिडिओ राखेका थिए।
त्यसरी भिडिओ राखेको पाएपछि ब्युरोले प्रहरी प्रतिवेदनको आधारमा उनलाई पक्राउ गरेको थियो।
-1746009348.jpg)
